Bâna Kaih hnuaia thlai hralh leh lei kalpui dan tur inhrilhfiahna hun hmang

Bâna Kaih (Handholding) Scheme hnuaia thlai thar hralh leh lei kalpui dan tur inhrilhfiahna nimin khan Irrigation & Water Resources Auditorium-ah buatsaih a ni a; adviser to CM (Handholding) Dr KC Lalmalsawmzauva, Mizoram Agricultural Marketing Board (MAMB) co-chairman ni bawkin a hmanpui.

Dr KC Lalmalsawmzauva chuan, hmalakna hlawhtling turin rinawmna a pawimawh hmasa ber tih sawiin, "Taimakna leh rinawmna a kal kawp tlat chuan hlawhtlinna a thleng ṭhin. Ram hmangaihna leh tihhmasawn duhna thinlung pu mite chu Bana Kaih Scheme hlawhtlin nan an pawimawh dawn a, kut hnathawktute dinhmun chawi kan nan hian kan vaia ṭanrual a pawimawh," a ti.

Bana Kaih scheme-in a tum zingah Mizoram leilung hausakna humhalh a tel thu sawiin KC Lalmalsawmzauva chuan, "Kut hnathawktute'n huan, lo nghet an neih theihna tur ngaihtuah tel a ni," a ti a; thlai tharte hlâwk zawka hralh a nih theih nan thlai tharte uluk taka sawngbawl a pawimawh thu a sawi.

Adviser to CM chuan, "Sorkar aṭanga a thlawna thil beiseina hi hmasawnna tiṭhuanawptu a nih ṭhin avangin Bana Kaih scheme hian a thlawna sem chu thupuiah a hmang ve lo," a ti a; thlai thar lei tumte chu chhinchhiahna felfai tak, a ṭul huna en lêt theih tur vawng tur leh hmasawnna thlen thei tur inelna thianghlim nei turin a chah.

Sensitization cum Consultation Meeting on Thlai Thar Market hi Dr H Saithantluanga'n a kaihruai a, MAMB member-te leh district hrang hranga thlai lei tum (buyer/commission agent)-te an tel. MAMB managing director Lalhmingmuana'n sawhthing, hmunphiah, aieng leh hmarchate lei leh hralh chungchanga Bana Kaih Scheme hnuaia support price kalpui dan tur a zirtir a; sorkar hriatpui auction centre aṭanga thlai thar hralhte chauh hi support price pek tur a nih thu a sawi.