MNF hnuaiah lo chuan Mizoram a dam lo - Ruatkima

MNF treasurer Lalruatkima chuan, an party chuan hnam an hnuchhawn thei lo a, an dinnaah an nghet bik nia sawiin, MNF sorkar hnuaiah lo chuan Mizoram a dam lo niin a sawi.

Lalruatkima hian nimin khan Aizawl South-III MNF South Block-in Sialsuka Party Workers Meet an buatsaih a hmanpuinaah thu sawiin, "Kan ram hi MNF sorkar hnuaiah lo chuan a dam lo. Enchhin sorkar hnuaiah hian chhiah vawi hnih tihpun a ni tawh a, buhfai leh oil man pung hian a nghawng a na hle. Kalphung thar enchhin sorkar hi eiruk hmang an tihte sorkar aiin a chhe zawk," a ti.

MNF chu eptu party an nih hriat loh khawpin an lungrual nia sawiin Lalruatkima chuan, "A chhan chu Pu Laldenga te khan kan rilruah hnam thinlung min tuhsak tlat avangin MNF chuan hnam kan hnuchhawn thei lo, kan dinnaah pawh kan nghet bik," a ti a; MNF-in ni pawimawh an bik chuan MNF mite a tinghet niin a sawi.

MNF Treasurer chuan, ZPM kaihhruai sorkarah inchhir kum a nih mek thu sawiin, "Nakumah pawh mipui thinlungah chuan inchhir kum a ni leh ang, a kum lehah chutiang zelin. Kum 2028-ah chuan inlamlet kum tiin kan puang ang," a ti.