Naupang humhalhna tur ngaihtuah

Social Welfare, Tribal Affairs & Women and Child Development (SWTAWCD), School Education, Samagra Shiksha leh Mizoram State Commission for Protection of Child Rights (MSCPCR) hotute chuan nimin khan Planning conference hall-ah inrawnkhawmna hun an hmang a; naupang humhalhna tur thilte an rêl.

Inrâwnkhawmna hi MSCPCR chairperson Jimmy Laltlanmawia'n a kaihruai a; WCD director Zoramthangi Chhangte leh deputy director Sailopari te, School Education deputy director Laldingliana, Samagra Shiksha Mizoram deputy state project director PC Vanlalnghaka, Aizawl Special Home superintendent Zothanpari, Mizoram State Child Protection Society principal programme manager Amy Lalrinpuii leh programme officer Lalruatkimi te an tel.

SWTAWCD minister Lalrinpuii hoa October 10, 2024-a department hrang hrang hotute ṭhukhawmin an rel tawhte bawhzui dan leh hmalak dan tur sawiho a ni. An sawiho zingah naupang sikul ip (bag) rih zawng tihniam tura hmalak dan tur te, zirlai kaihhnawih inenkawlna hrang hrangte naupang tana hmasawnna tur leh phurrit awm lo tura kalpui leh ruahmanna siamte a tel a ni.

INRAWNKHAWMNAA SAWIHO DANGTE

1. Naupang enkawlna hmuna naupangte'n bahlah loa zirna an chhunzawm theihna tura sikul tihchangtlun dan tur.

2. Children’s home-a naupang, kum 18 an tlin hnua lêtna leh hawna tur ṭha leh belhchian dawl chhungkua nei lo leh, mahnia inenkawl thei tura thiamna mumal nei lote tana enkawl zuina, after care programme tihhmasawn dan tur.

3. Children’s home hrang hranga sum leh thawktu indaih lohna bakah, harsatna dangte sutkian dan tur.