Hmeichhe naupang himna inhrilhfiah

School Education department leh Women & Child Development chuan nimin khan School Education conference hall-ah hmeichhe naupang venhim leh zirtir chungchang inhrilhfiahna, 'Sensitization Programme on BBBP' an buatsaih a; Education minister Dr Vanlalthlana'n a hmanpui.

Dr Vanlalthlana chuan, hmeichhiate chu khawtlang inrêlbâwlnaah an pawimawh thu sawiin, "Kan khawsakna hmuna hmeichhe chunga hleilenna tihtawp a ngai a, district tinah hmalak a ngai. He hmalakna hian mipa leh hmeichhe inthliarna leh inenhranna te, mihring zalenna chhuhsak te, dan laka enhrannate a huam vek a, naupangte chhan chhuak tur hian kan chêt a ngai a ni," a ti.

Education Minister hian November 25 - December 10, 2024 chhunga hman tur '16 Days Awareness Campaign for Eliminating Gender- Based Violence' a hawng nghal a ni.

Inkhawm hi School Education special secretary Lalthantluanga'n a kaihruai a, director Angela Zothanpuii leh WCD director Zoramthangi Chhangte ten thu an sawi. Department pahnih hnuaia hotute an tel a ni.