Governor leh Chief Secretary inkâwm

Mizoram chief secretary thar Khilli Ram Meena chuan nimin khan Raj Bhavan-ah Governor Dr Hari Babu Kambhampati a tlawh a, Mizoram hmasawnna tura pawimawh hrang hrangte an sawi dun.

Governor chuan, sorkar laipui scheme pawimawh tak tak Mizoramin a ṭangkaipui theih turte ngaihven a ṭul thu a sawi a, "Inkalpawhna kawngpui te, inbiakpawhna changtlung leh power sector-a intodelhte ngaih pawimawh hmasak a ngai," a ti.

Larsap chuan, "Mizoram hi tourism sector-a theihna nasa tak nei a nih avangin India ram hmun danga awmte'n Mizoram leh ami chengte chungchang an hriat bela an tlawh tam zawk theih nan ṭan lak a ṭul hle," a ti a; Mizoramah ṭangkai taka helicopter service hman a nih dan te, indaih lohnate pawh UDAN scheme leh ruahmanna dang awm theite dapa ngaihven a ṭul thute a sawi.

Mizoram chu India rama state ralmuang ber, sik leh sa nuam, faina, ziak leh chhiar leh inthununna kawnga entawn tlak a nih thu sawiin Governor chuan, "Sorkar laipui hnuaia infrastructure project lian tak tak thawh mek te, a bik takin kawngpui leh rêl kawng sial mekte a hun takah tlo leh ṭha taka zawhfel a nih theih nan department leh agency kaih­hnawihte ṭha taka kaihruaiin, a khât tâwkin ṭhut khawmpui ang che," a ti. Ram dang nena inkalpawhna leh insumdawn tawnna kawngpui pawimawhte pawh ngaihven a pawimawh thu a hrilh bawk.

Khilli Ram Meena pawhin Governor chu hna a lo thawh tawh dante a hrilh a ni.