Bâna Kaih hian mipui a thleng phâk lo - Congress Treasurer

Mizoram Pradesh Congress Committee treasurer Dr Lalmalsawma Nghaka chuan nimin khan Aizawl South-II Congress-in Rokunga Hall, Venghnuaia intawhkhawmna an buatsaihah thu sawiin, ZPM policy Bâna Kaih chuan mipui a thleng phak lo niin a sawi.

Dr Lalmalsawma Nghaka chuan, "Handholding Policy hian mipui thleng phak loin, an duhsak zawngte chauh bânah an kai. Mipui nawlpui ban phâk lohin ZPM sorkar hian a bán a pharsan ta emaw tih mai turin an awm a, mi nawlpui bânah an kai ang tih an hlau ni awm fahranin thlai thar an lei dan turah te, Handholding loan pek dan turahte thil a harsa zawngin an ti thiam," a ti.

Mipui hnenah vote zawn nan sorkarin CM Special Package an tawktarh nia sawiin Dr Lalmalsawma chuan, "A kalphung hian mipui thleng phak loin, an duhsak zawng mi tlemtê tan an siam a, inthlan apiangin vote zawn nan ber hmangin, rulh ngai lo loan tiin an campaign mek a ni," a ti a; mahse, CM Special Package dawng tur chu an duhsak zawng mi tlemtê niin a sawi.

Congress Treasurer chuan, Bâna Kaih hnuaia loan an sawi chu sorkar laipui scheme awm sa PMEGP, CGTMSE leh a dangte an rinchhana tih niin a sawi a, "Handhold loan hian kalphung a nei lo a, loan diltute hian Handhold loan kaltlang loa mimal anga mahnia an dil theih thil a ni," a ti.

Dr Lalmalsawma chuan, tunlaiin sorkar hnathawkte vauna a thleng nia sawiin, "Kan CM Pu Lalduhoma'n sorkar hnathawk chhawr tlak lohte bân mai ṭha kan ti a ti a, a dikna chen a awm a, zir chiang ngai tak thil a ni mai thei," a ti a; mahniah bul ṭan hmasak a ngai tih sawiin, Adviser to CM, consultant, board chairman leh OSD eng emaw zat awmte chu mipui tana ṭangkaina awm lo a nih avangin bàn hmasa phawt se a duh thu a sawi a ni.