Boeing CSR - zirna leh hriselna atan

Chief minister Lalduhoma hoin November 27, Nilaini khan CMO conference hall-ah Mizoram sorkar hotute leh Boeing Foundation hotute'n Mizoram tana Boeing company corporate social responsibility (CSR) hman dan tur an sawiho a; Mizoram zirna leh hriselna tihhmasawnna atan hman an rel.

Boeing (India & South Asia) chief of staff leh CSR head ni bawk Praveena Yagnambhat chuan, Boeing company dinhmun leh CSR an hman dan tlangpuite a sawifiah a; Covid-19 len laiin Aizawl, Lunglei leh Siaha hospital-ahte an thawhpui Doctors for You-te kaltlangin hmanrua an pek thu a sawi.

Praveena Yagnambhat chuan, Mizorama hriselna lam leh zirna lamah hmalakna zau zawk rawn neih an duh thu sawiin, "Kan kal dante rawn sawifiah pahin hmalakna tur kan rawn ngaihven a ni. Chief Minister leh a thawhpuite'n inhawng taka min dawnsawnna leh min thawhpui in inhuamna hi ropui ka ti a, kan lawm hle," a ti.

Ṭhutkhawmah hian cancer zai ngaite zaitu tur doctor thiam bik a thlawna Aizawla tirh dan tur te, ZMC-a ICU hmanraw ṭha leh tunlai zawk dah belh dan turte an sawiho a; a ṭul anga Cancer Hospital leh ZMC hmunhmate tlawha bawhzui ni se, an ti.

Zirna lamah Boeing company hian Learning Links Foundation nen hma an la a; Education department-in Tinkering Labs an kalpui mek tihchangtlun te, Mizoram zirna-in ṭhenkhata Sukanya STEM lab bun ve dan tur leh hmalak theihna remchang dangte an sawi bawk.