Minister-in Mini Jamboree khârna a hmanpui

Sports & Youth Services minister Lalnghinglova Hmar, Mizoram Bharat Scouts & Guides vice president ni bawk chuan November 27, Nilaini khan State Training Centre, Tanhrila Bharat Scouts & Guides 8th North East Mini Jamboree khârna hun a hmanpui.

Lalnghinglova Hmar chuan, Scouts & Guides-a tel chu mahni mihringpuite rawngbawlna ropui tak a nih thu sawiin, "Mizo tlawmngaihna nen pawh a inhmeh hle. Zirlaite'n in hmazawna remchanna inhawng apiang ṭangkai taka hman nghal zel tum u la, khawvel inher danglam zel milin insiam rem ve zel ang che u," a ti a; Mizoram pawn aṭanga telte chu Mizoram tlawh fo turin a sawm.

Mini Jamboree khârna hi Mizoram Bharat Scouts & Guides state secretary Lalngilneia Colney-in a kaihruai a; Jamboree-a tel Assam, Meghalaya, Eastern Railway leh Mizoram aṭanga Scouts & Guides-te'n an hnam làm ṭheuh an entir a ni.

NE Mini Jamboree hi India hmarchhak hmun hrang hrangah buatsaih ṭhin a ni a, kumin hi a vawi riatna niin, Mizoramin a thlen vawi hnihna a ni.