Mizorama hri vei hmuh tam ber ní a thleng Sept. 9-ah hripui vei 141 hmu chhuak LC inthlana official duty mi 70 an tel
September 9, Nilaini khan Mizoramah Covid-19 vei mi 141 hmuh chhuah a ni a, ni khata hmuh chhuah tam ber ní a ni. Hriat theih chinah, mi 141 zinga 94 chu Mizoram chhunga kai chhawng (local positive contact) an ni a, mi 94 zinga mi 70 chu kumin August 27 leh September 4-a local council inthlannaa duty-te niin, kaina àwm hriat loh mi pali an awm.
Covid-19 vei Nilainia hmuh chhuah zinga 138 chu Zoram Medical College (ZMC) laboratory-a RT-PCR hmanga hmuh chhuah a ni a, mi pathum chu Vairengte checkgate-a Rapid Antigen Test (RAT) hmanga hmuh chhuah niin, hnam dang driver/handyman vek an ni.
ZMC-a hmuh chhuahte hi mipa 104 leh hmeichhia 34, kum 5-74 inkar an ni a, Aizawl district mi 137 leh Champhai district mi pakhat an ni. Nilaini hian ZMC-ah mi 176-te swab sample endikah mi 138-in hripui an vei a, hripui vei hi endik zat aṭangin 78.41% a tling.
September 9-a swab sample test result kaihhnawihah hian nimin khan Aizawla veng 18 chuan an veng chhungah inkhàrkhip (lockdown) an puang a; inkhàrkhip ni chiah lo, veng pum huapa páwna chhuak lo tura inhriattir veng an awm nual bawk.
Aizawl Civil Hospital-ah Covid-19 vei hmuh chhuah an awm avangin nimin khan damdawi-in hi hmun dang aṭanga tlawh loh turin khàr a ni a, vawiinah pawh khàr chhunzawm a ni ang. Directorate of Sports & Youth Services chu thawktu zingah hripui vei an awm avangin khâr rih a ni a; Synod Office pawh tiam chin awm loin khàr rih a ni.
Mizoram chhunga kái chhâwng nia hriat mi 94-te chu Aizawla veng 26-a mite an ni a; chutih laiin, hripui vei hmuh thar an tam deuh avang leh, an chanchin kimchang chhui kim theih a la nih rih loh avangin an nihna chiang zawk he thu ziah lai hian hriat theih a la ni lo.
Aizawla veng 26-a LTF/YMA hruaitute chu Vanglaini palaiin a be vek a; khawtlang hruaitute sawi danin, Covid-19 vei hmuh chhuah thar, local council inthlana mawhphurhna nei mi 70 zinga a tam zawk chu counting assistant an ni. Counting assistant zinga eng emaw zat chu August 24, 2020-a training-a tel an ni a, chuta ṭanga kái chhâwng nia hriat an ni hlawm.
August 24, 2020-a election training hi Covid-19 inkai darhna ber pakhata ngaih a nih laiin, September 9-a endikte hi a hma ní, September 8-a swab sample laksak an ni hlawm a; a hun a inkar hlat avangin an kài chhàwn theiha ngaihte chhui hna (contact tracing) pawh a buaithlak thu leh swab test tura ngaih an tam thu, LTF/YMA hruaitute chuan an sawi deuh vek a ni.
Hripui kài chhàwnna awm hre lo leh rin dan nei lo mi palite chu Bungkawn leh Chaltlang mi pakhat ve ve leh, Salem Veng mi pahnih an ni a; Salem Veng mite hi LTF mi leh sa niin, rinhlelh an nih vanga swab sample laksak an ni lo tih, Salem Veng YMA hruaitute chuan an sawi.
Mizoram chhunga kai ngei nia hriat ni lo, state pawn aṭanga tun hnaia rawn lut zingah Covid-19 vei hmuh chhuah mi eng emaw zat an awm. Quarantine facility-a awm lai zinga hripui vei hmuh chhuah sorkar thuchhuakin a tarlan danin, CYMA Girl's Hostel, Lawipua awm mi pakhat, Pentecostal Camping Centre, Sakawrtuichhuna awm mi pariat, Salvation Army Hall, Hunthar Venga awm mi pakhat, Finance department building, ITI-a awm mi 24, Berawtlanga Tourist Lodge-a awm mi panga leh, Grace Girls Hostel-a awm pathumte an ni.
Covid-19 kai zinga hriat chian theih pakhat chu Champhai Kanan Veng mi, sipai chawlh hmanga lo haw, sorkar quarantine facility-a awm mek a ni a; Ramthar Veng, Aizawlah Kolkata aṭanga lo haw, home quarantine lai pakhat pawhin hripui a vei tih hmuh a ni.
Hetih lai hian, sorkar thuchhuaka Tuivamit veng mi, local positive contact anga tarlan mi 17 zinga pakua chu hnam dang, tun hnaia state páwn aṭanga rawn lut, PGCI, Tuivamita khung hran lai an nih thu, Tuivamit YMA hruaitute chuan an sawi.
Aizawla inkharkhip vengte
No. Veng
1. Armed Veng South
2. Bawngkawn
3. Bethlehem
Vengthlang
4. Chaltlang
5. College Veng
(partial lockdown)
5. Durtlang
6. Durtlang Leitan
(partial lockdown)
7. Edenthar Veng
8. Electric Veng
9. Hunthar Veng
10. Ramhlun North
11. Ramthar Veng
12. Salem Veng
13. Tanhril
14. Tuikhuahtlang
15. Tuithiang
16. Tuivamit
17. Venghlui
18. Zuangtui
September 9-a Aizawla local positive contact dinhmun
No. Veng Vei zat Dinhmun / kai chhana ngaih
1. Armed Veng South 1 Election training-ah a tel a, an venga
an chênna bul chiahah police positive an awm.
2. Bawngkawn 14 Election duty mi pasarih; Chanmari West-a
positive-te nena inkaihhnawih leh chhan dang.
3. Bethlehem Vengthlang 5 Health department driver, swab sample laknaa tel ṭhin 1;
SIPMIU contractor hnuaia thawk hnam dang 4.
4. Bungkawn 1 Kai ṭanna hriat loh.
5. Chaltlang 7 Election duty 2; Pet Division-a kal 3;
Chhan hriat loh 1; Chennai aṭanga haw 1.
6. Chanmari West 5 Election duty vek.
7. College Veng 2 Election duty ve ve.
8. Dawrpui 3 Election duty vek.
9. Durtlang 3 Election duty vek.
10. Durtlang Leitan 2 Election counting assistant ve ve.
11. Edenthar Veng 3 Election duty vek (Edenthar leh Lily Veng)-ah
12. Electric Veng 4 Election counting assistant vek.
13. Falkland Veng 2 Election duty ve ve
14. Hunthar Veng 2 Pet Division-a kal 1; Tuikhuahtlanga nurse aṭangin 1.
15. ITI Veng 1 Aizawl DC pisaa thawk (private test),
Dongdong Catering bill buaipuitu.
16. Khatla East 1 Berawtlang CCC-a duty
17. Mission Veng 2 Election counting assistant ve ve.
18. Ramhlun North 2 Election duty ve ve.
19. Ramthar Veng 1 Election duty & ITI Veng CCC-a duty.
20. Salem Veng 5 ZMC-a awm sa 1; Kulikawn Pet Division-a kal unau 2;
LTF hruaitu pahnih - kai chhan hre lo.
21. Tanhril 3 Election duty vek
Election duty 3, PGCI hotu 2;
22. Tuivamit 14 PGCI hnuaia thawk hnam dang 9
(Mi 9-te hi state pawn aṭanga rawn lut)
23. Tuikhuahtlang 4 Election duty 2; P&E-a thawk 1; Assembly-a thawk 1
(Anni hi an veng mi nurse aṭangin a ni thei bawk)
24. Tuithiang 3 Election counting official vek (kohhran upa vek)
25. Venghlui 3 Election duty vek (Venghlui leh Republic Vengthlang)
26. Zuangtui 1 Election counting assistant
(Aug. 27-ah Zuangtui, Sept. 4-ah Durtlang North)