Serchhipah TrueNAT lab. hawng

Serchhip DC Kumar Abhishek chuan nimin khan Serchhip District Hospital-a bun thar Covid-19 vei leh vei loh hriatna tura swab sample endikna khawl TrueNAT laboratory a hawng a, mi pakuate swab sample endik nghal a ni.

Kumar Abhishek chuan, Serchhip district-in an mamawh em em, Covid-19 dona kawnga hmasawnna nasa tak thlen thei tur khawl an nei ta chu lawmawm a tih thu a sawi a, "Hmasawnna lian tak a ni. ZMC-a sample inthawn hian hun a duh rei a, sample phurhnaah sum leh pai sên a ṭul a, chungte chu he kháwl vang hian a ziaawm tawh dawn a ni. Hmanhmawha contact tracing tih leh sample test zung zung ṭul hunah pawh a ṭangkai hle dawn," a ti.

Laboratory hawn zawh hian positive contact tracing aṭanga sample lak ṭhenkhat leh quarantine centre-a awm mi pakuate sample endik nghal a ni a, he thu buatsaih lai hian result a la chhuak lo.