Sorkar tha, nêlawm, langtlang Lepsê ngam siam kan duh: CM

Administrative Training Institute (ATI) chuan nimin khan sorkar officer-te pualin Vanapa Hall-ah Right to Information Act, 2005 chungchang zirhona an buatsaih a; khuallian, chief minister Lal Thanhawla chuan, sorkar hnathawkte chu sorkar neitu dik tak an ni a, mipuite innghahna leh beisei an nih thu sawiin, "Sorkar ṭha leh dik, nêlawm leh langtlang, lepsê ngam siam kan duh," a ti.

Hawla chuan, sorkar ṭha leh dik, langtlang leh lepse ngam siam turin RTI Act chu hmanraw ṭangkai a nih thu leh hman ṭangkai an duh thu a sawi a, "RTI Act hi eirûkna vengtu a ni," a ti a; RTI Act-in democracy-ah a ṭha zawnga inthlakthleng a thlen thei tih a sawi.
CM Lal Thanhawla chuan, Mizoramin hun eng emaw chen State Information Commission a nei tawh tih sawiin, "Mahse, eirûkna vengtu berah eirûkna a awm ṭhin tih hriat a ni a, tuna chief information commissioner Lal Dingliana a awm aṭang chuan eirukna chu a bo tawh," a ti.
State Information Commission chuan hna an thawk nasa a, Mizoram hmun kilkhawr zawk thlengin RTI Act pawimawhna mipuite hnenah an tlangaupui ṭhin tih a sawi a. RTI Act khawihtute chu an hna baka phurrit pek belhah inngai lo turin a fuih a; miin thil hriat duh an neihte dik tak leh a hun chhung ngeia pe ṭhin turin a chah.
Chief Minister chuan, hmasawnna nei turin mi tinin mawh an phurh thu sawiin, "Sorkarin dan behchhana tih tur min phût ang ang hi kan ti mai tur a ni. Hei hian mipuite tana mi ṭangkai leh mipuite zahah kan insiam thei a ni," a ti.
DC office-a MLA fund pek chhuah danah, "A lo buaipuitu leh khawihtu ṭhenkhatin anmahni tan an lo pawtpéng ve ṭhin tih hriat a ni a, hei hi an tih miah loh tur, sim vat chi a ni," a ti bawk.
Chief information commissioner Lal Dingliana pawhin thu sawiin, "RTI Act hi mipuite tan sorkar dik leh langtlang siam nan leh eirûk venna atan a siam a ni a, he dan hian mipui leh sorkar inkar pawh a pawt hnai hle a ni," a ti a; mi tu pawhin RTI Act hmanga sorkara thil hriat duh a neihte chuan dik takin sorkarin a hrilh tur a ni tih a sawi.
Inkhawm kaihruaitu Lal­malsawma, chief secretary chuan, "He dan hi sorkar kalphung dan siamah a pawimawh ber pakhat a ni a, mipuite zawhna kan chhanah thu dik zîktluak kan hrilh ṭhin lo hi a pawi thei a, kan inenfiah fo a ṭul," a ti.
RTI Act workshop hi niléngin neih a ni a, ATI deputy director Vanlalvuana'n ‘Background and Evolution of RTI in India - Salient Features of RTI Act, 2005’ tih thupui a sawi a; sawihona hun hman a ni bawk.