KHAWTHLIR
Laih phal lo
PWD chuan, fur a inṭan tawh avangin June 5, 2015 aṭangin thu leh awm hma chuan Aizawl chhungah tui pipe phûm tur leh thil dangah kawngpui laih phal a nih loh thu an sawi.
Vawktê sem
AH&Vety department chuan nimin NLUP hnuaiah vawktê pali ṭheuh an sem. Vawktê hi Zobawka chhungkaw 50, Ṭawipui North-II ah chhungkaw 50, Phairuangkaiah chhungkaw 125, Rualalungah chhungkaw 121 leh Buarpuiah chhungkaw 28 hnenah sem a ni.
Inlàwnsiak
Mizoram Climbing Association leh Home Missions School, Aizawl chuan Ningani zan khan 1st. Mizoram Climbing Invitation Tournament an buatsaih ṭan a, vawiinah zawh a ni ang.
Karate medal late lawmpui
Mizoram State Sports Council (MSSC) chuan nimin khan an pisaah National Karate Championship 2015-a medal 13 latu Mizoram Karate team-te lawmpuina hun an hmang a, government deputy chief whip RL Pianmawia'n a hmanpui. May 16-17, 2015 chhunga Pune, Maharashtra-a 18th National Karate Championship-ah Mizoram team chuan medal 13 an la a; chungte chu gold medal pasarih, silver medal panga leh bronze medal pakhat a ni.
Seventhday-in hriselna zir
Mizo Conference of Seventhday Adventists chuan nimin khan Seventhday Tlanga an office conference hall-ah hriselna chungchang zirhona an buatsaih a, Mizoram sorkara Health principal director Dr K Ropari'n a hmanpui. Seminar-ah hian Seventhday Adventist Health Ministries-a associate director Dr Fred G Hardinge-a'n hriselna chungchang a zirtir a ni.
Dy. speaker-in hmanpui
Assembly deputy speaker R Lalrinawma chuan nimin khan a bial chhunga Sihphir Branch YMA-in an veng chhunga kum 2014-15 academic session-a zirlai pass chhuakte - HSLC-ah zirlai 55, HSSLC-ah zirlai 37, graduate/post graduate-h zirlai pasarihte chawimawina hun an buatsaih a hmanpui.
Mizo nunphung zir
Johnson College-a Research & Extension Committee leh Mizoram Cooperative Apex Bank Ltd. ṭangkawp chuan nimin khan Aizawla IPR Conference Hall-ah 'Emerging issues in contemporary Mizo society' tih thupui hmangin national seminar an buatsaih a, Higher & Technical Education director R Lalrosanga'n a hmanpui. Seminar-ah hian mithiam 11-te thuziak ngaithlaka zirho a ni.
MLA lawmpui
PWD Football Club a din laia player ṭhin Lalruatkima, Aizawl West-II bialtu MLA chu MLA-a a tlin avangin nimin khan PWD FC-a captain ṭhin Lalṭanpuia in, Chaltlangah lawmpuina hun an hmang a, chawhlui an kîlho nghal.