Naupang huaisen lawmman hlan

Sorkar laipuiin nau­pang huaisen chawi­mawina, Jeevan Raksha Padak a pek chu nimin khan Mamit district-a a dawngtute hnenah Mamit DC Vanlalngaihsaka'n DC conference hall-ah a hlan. Chawimawina dawngtute chu - Mal­sawmtluangi (L) leh Hani Ngurdinthari, Lengte khua ve ve an ni.

Award hlanna in­khawm hi Mamit addi­tional DC Lalbiak­sangi'n a kaihruai a; chawi­mawina thuziak chu DC Vanlalngaihsaka’n Malsawmtluangi nu leh pate leh Hani Ngur­dinthari hnenah a hlan a, medal chu Mamit SP Lalnunmawia'n a hlan thung. Award hian chawimawina thuchei, medal leh Rs. 40,000 a keng a ni.

June 8, 2013 khan Malsawmtluangi leh a nau Vanrosanga bakah, Hani Ngurdinthari leh mi dang pathumte chu Dialdâwk luiah an kal a, an haw lama lui an dài kaina lamah Vanrosanga chu tuiin a la a ni. Vanro­sanga chhan tumin a u Malsawmtluangi chu tui hleuh thiam lo chungin luiah a zuang lut a, mahse Malsawmtluangi chu tui lian chuan a la a, a thih phah a ni.

Hani Ngurdinthari pawh a ṭhiante chhan tumin lui lí-ah a zuang lut a, Vanrosanga chu khawih fuhin, vaukamah a hnûk chhuak a, Vanro­sanga nikhaw hre loa a awm chu a thiam dan ang anga sawngbawlin, a chhanchhuak thei ta a ni.