Khawlailung Village Development Plan pawm

Lok Sabha MP CL Ruala’n SAGY hnuaia model village atana a thlan, Khawlailung khaw tihhmasawnna tura Village Development Plan siam chu nimin khan Serchhip DRDA conference hall-ah CL Ruala hoin endik a ni a; siamṭhat ngaite an siamṭhat hnuah an pawm.

Khawlailung Village Development Plan enhonaah hian Khawlailung V/C member-te leh hmasawnna hna thawk tur department hotute an tel a; pawm a nih hnuah MP CL Ruala, Serchhip DC Juhi Mukherjee, charge officer Teresy Van­lalhruaii leh Khawlailung VCP KThangbawia ten hming an ziak a ni.

CL Ruala chuan, SAGY line department official-te thawhrimna leh ṭhahnem­ngaihnaah lawmthu sawiin, Khawlailung chu khaw entawn­tlaka siam a nih ngei theih nan theihtawp chhuah turin a sáwm a; sorkar laipuiin model village siamna tur sum a hranpaa a dah loh avangin mipuite rilrua hmasawnna duh tak takna thinlung tuh a pawimawh thu a sawi. MP hian khaw chhung mamawh zualpui hna thawh hmasakna turin MP fund aṭangin Rs. 10,00,000 a pe nghal bawk.

Khawlailung Village Development Plan hi line de­part­ment 20-te’n Khawlailung mipuite nena inráwna an siam a ni a, line department-te chuan Plan hrang hrang an siamte chu priority number 1, 2, leh 3-ah an thliar a ni. Model Village Development Plan hi May 2015 ral hmaa sorkar laipuia thehluh tur a ni a, Central-in a pawm hnuah July 2015 aṭangin hmalak ṭan nghal tur a ni.