Aizawla thil rûk chíng mi pahnih man
Mizoram police-te chuan Aizawl khawpui veng hrang hranga in rawk leh thil rûk chíng Lalhmingliana (33) s/o Thanzama, Bungkawn chu May 23, 2015 khan an man a; mi thil rûk chíng dang, Eric Lalsangzela (21) s/o Lalṭanpuia, Serchhip Bazar Veng inti an man bawk.
Police PRO tarlan danin, Lalhmingliana hi May 10, 2015-a Khatlaa in rawkah rinhlelh niin, police-te'n an zawng a, May 23 khan Champhaiah an man ta a ni.
Lalhmingliana hian tun hma aṭanga Aizawl veng hrang hranga in a rawk tawhte leh thil a rûk tawhte police hmaah a puang a; a thil rûk zingah chuan police pistol, laptop, gas bûr leh TV-te a tel.
Police-te chuan May 28, 2015 Aizawla mi thil rûk chíng dang Eric Lalsangzela an man bawk a; ani pawh hian police hmaah a thil rûk tawhte a puang a ni.
Police thuchhuah chuan, mi thil rûk leisak chu dan bawhchhiatna a ni a, dan anga hrem theih, jail tân theihna a nih thu sawiin, mipuite chu mi thil rûk lei lo tura fimkhur turin an chah a; mi thil rûk ni ngeia rinhlelh kawl leh zuar hriate chu leisak loa police hriattir ṭhin turin an chah bawk.