MZP-in zirtirtu Transfer and Posting Rules siamṭhat an duh

MZP chuan May 28, 2015 khan Bairabi North YMA Hall-ah Federal Council Sitting vawi 44-na an nei a; Mizoram sorkar enkawl sikul hrang hrangah zirtirtu rualkhai zawka an awm theih nan sorkarin Transfer and Posting Rules siam ṭha se an duh thu an puang.

MZP Federal Council Sitting hi vice president Lalsangzuala Ngente-in a kaihruai a, president Lalhmachhuana'n thu a sawi. Agenda pariat an pass bakah, resolution 'Mizo zirlaite tan hnam dang nupui/pasala nei lo tura inzirtirna leh intiamkamna ní siam ni rawh se,’ an pass a ni.

MZP thu pass-te zingah - zirna ina hnam dang dan loa an luh lohna tura hmalak te; Mizoram University hnuaia exam-ah result a chhuah hma zawk theih nana hmalak te; sikul ṭhenkhatin result ṭha an duh vanga zirlaite zir tur ni lo course an zir lâwktír ṭhin tihtawp a nih theih nana hmalak te; college changtlung saa post graduate zirna hawn a nih theih nana hmalak te; birth certificate, tribal certificate leh residential certificate dik taka pek chhuah a nih theih nana hmalakte a tel.