Politics-a thil ṭha lo la lutah Congress puh

MNF president Zoramthanga chuan, Congress party chu Mizoram politics-a zu leh sa leh mipat hmeichhiatna pawisak lohna pu luttu-ah a puh a, "Inthlana tih dan ṭha lo hrang hrang, vote lei leh mipui bumte Mizorama pu luttu pawh Congress party an ni," a ti.

Nimina Mizo Hnam Rûna MNF party inkhawmah thu sawiin, Zoramthanga chuan Congress party chu vai rama an tih dan ṭha lo apiang Mizorama la lutah puhin, "Zu leh sa chen, mipat hmeichhiatnaa pawisak neih loh political culture-a la luttu an ni. An zu in rûk ṭhin pawh a langin in law law ang tiin kohran leh khawtlang duh loh záwngin zu an zuar ta a ni," a ti a; Pathianin a Chanchinṭha hril tura a din Mizote rama vai culture ṭha lo hrang hrang Congress party-in an la lut chu ṭha lo an tih tak zet thu a sawi.

MNF President chuan, MNF party chu Pathian leh mipui zarah an sorkar leh ngei dawn niin a sawi a, "Pathianin India ram aa singsa mek a, Mizorama Congress sorkar pawh an bulpui Delhi-ah kihthlûk a nih tawh avangin hna mumal thawk thei loin an awm mek a ni," a ti. Congress party chu India rama state pathumah chiah sorkarna an chelh tawh nia sawiin, "India ramah Congress chu a zung nen kar phawiin a awm a, a ṭang nen lam a ro mek a ni," a ti bawk.

Nimina MNF inkhawmah hian May 28, 2015-a thi ta, B Lalduhsaka, LADC-a MDC sûnna hun an hmang a ni