Sangha chi ṭha lo semah sorkar puh

ZNP chuan thuchhuah siamin, Kolasib leh a chhehvela sangha dil neitute hnena sangha chi (fish seed) sem tum chu a ṭha lo a, a dawngtu turte'n dawn tlak loha an ngaih avangin an la duh lo niin an tarlang a; sangha chi ṭha lo sem tum a ni chu an dem thu an puang.

ZNP tarlan danin, sangha chi ṭha lo supply-tu chu ‘LN Kima Nursery Farm’ a ni a, a neitu chu Lalnunkima, Zawlnuam a ni. Kolasib leh a chhehvela sangha dil nei mi eng emaw zat chuan hriattirna an dawn angin, May 27 khan Bairabi kawnga Zero Point-ah sangha chi sem dawng turin zing dar 10 vel aṭangin an kalkhawm a; tlai dar 4 velah sangha chi chu a thleng a, mahse dam khawchhuak zo lo tura an ngaih avangin an dawng duh lo a ni.

ZNP chuan, Fisheries department-in sangha chi supply tura November 21, 2014-a quotation a chhuaha Terms and Conditions no. 6-a chuan sangha chi a zira sangha sei zawng tur chu milimetre 20-25 leh 40-70 a nih thu an sawi a; chu chu May 27-a sangha chi supply chuan a tling lo hle niin an tarlang.

ZNP chuan, Mizoram sorkar chu sangha khawia eizawng chhungkaw ṭhahnem tak tibeidawngah puhin, pawi an tih thu an sawi a, "Sangha chi ṭha an dawn thuai theih nan hma la nghal turin sorkar kan phût a ni," an ti.