Dan loa vaihlo hmanga siam zawrh man

30th May, 2015

Aizawl Distric Anti Tobacco Squad chuan nimin khan Aizawl New Market-ah special squad drive an nei a, dan loa zawrh vaihlo leh vaihlo aṭanga siam thil chi hrang hrang ṭhahnem tak an man.

Aizawl District ATS-te hian June 1-a World No Tobacco Day thupui, ‘Dan loa vaihlo hmanga sumdawnna titawp ang u’ tih bawhzuiin nimin khan Aizawl New Market an enfiah a; enfiahnaah hian Food Safety Officer pahnih, Police, Excise & Narcotics leh Custom department aiawhte bakah, Mizoram State Anti Tobacco Control Society hotutete an tel.

Special drive-ah hian vaihlo aṭanga siam ei chi Sikhar báwm 2,915, S-4 (four) báwm 2,370, Rajni bâwm 420 leh Tulsi bâwm 162 an man a; khawchhak lam aṭanga lak luh pictorial warning awm lo Winnbody Cigarette cartoon 50 an man bawk. An thil man neitute chu Cigarette and other Tobacco Products Act (COTPA) hmangin thubuai siamsak an ni.