Mizorama inkhârkhip chungchangah Sorkar laipuia MHA ràwn tum a ni

Health & Family Welfare (HFW) minister Dr R Lalthangliana hoin nimin khan Secretariat conference hall-ah September 9, 2020-a Covid-19 vei hmuh chhuah an tam avangin hmalak zel dan tur ngaihtuah a ni a; inkhàrkhip (lockdown) chungchangah sorkar laipuia Ministry of Home Affairs (MHA) râwn an rél. 

Meeting-ah hian Home minister Lalchamliana, IPR minister Lalruatkima, Covid-19 Medical Operational Team chairman leader Dr ZR Thiamsanga, MLA, chief secretary Lalnunmawia Chuango, NGO Coordination Committee leh Mizoram Kohhran Hruaitu Committee (MKHC) hruaitute an tel.

NGO Coordination Committee leh MKHC hruaitute chuan, sorkarin harsatna a tawk emaw, mamawhna a neihah chuan theihtawp chhuahpui an tum thu an sawi.

Ṭhutkhawmah hian, inkhàrkhip chungchangah MHA-in Unlock 4.0 kaihhruaina a siam thlir chung leh, a ṭul anga MHA râwn chungin thuneitu pawimawhte'n ruahmanna siamin hma lo la se, an ti. He thu ziah lai thleng hian kal zel dan tura thutlukna hriat a la ni lo.

.    Covid-19 veite enkawlna tur Covid Care Centre (CCC), civil mi 1,737 enkawl theihna tur leh para-military force mi 303 enkawl theihna tur a awm mek.

.    Aizawl leh a chhehvelah CCC mamawh belh a ni a; Tuikhuahtlang Presbyterian Kohhran leh Branch YMA-in CCC atan an hmunhma hman an remti.

.    Hripui darh nasat avangin dinhmun derthâwnga awm sa (vulnerable group)-te - kum upate, natna benvawn neite leh naupangte dinhmun ngaihtuah lehzual a pawimawh.

.    Covid-19 pung zel tur vèn nan leh dinhmun mek thlirin, a hmatáwnga thawkte'n an hna ṭha tak leh chak taka an thawh theih nan hmalak a ṭul.