Delhi-ah EFCC Minister-te an inkâwm

Environment, Forests & Climate Change (EFCC) minister Lalthansanga chuan nimin khan New Delhi-ah Union EFCC minister Bhupender Yadav leh EFCC ministry hotute a kâwm a, Aizawl Zoological Park (Sahuan) tihchangtlunna tur leh pawimawh dangte a sawipui.

Lalthansanga hian sorkar laipui hotute hnenah hian Aizawl Sahuan tihchangtlunna atana ruahmanna hrang hrang - sahuan chhunga kum upate tana hman theih tur e-vehicle dah, solar power bun, ramsa hliam enkawlna tur Rescue & Rehabilitation Centre dinte a sawipui. Kum 2022 hnu lama Central Zoo Authority aṭanga tun thlenga zoo recognition la hmuh loh chungchang leh Champhaia rescue centre second installment chungchang a thlen bawk.

Minister Lalthansanga thu thlen chungchangah hian sorkar laipui hotute chuan a ṭul anga an lo bawhzui ngei tur thu an sawi tih sorkar thuchhuahin a tarlang.

EFCC Minister hi EFCC secretary H Lalengmawia leh IFS officer-te'n an ṭawiawm a ni.