Inthlan vangin Covid-19 a darh - MPCC CMRF-a a thlâwna sample endik an phût

MPCC Media department chuan nimin khan Aizawl Press Club-ah thuthar thehdarhtute an kâwm a; Mizoram sorkarin village council leh local council inthlan a buatsaih luih avangin Mizoramah nasa takin Covid-19 a darh mek nia sawiin, Chief Minister's Relief Fund (CMRF) aṭangin a thlàwna swab sample test kalpui an phût tih an puang.

MPCC Media chairman Dr Lallianchhunga chuan, Mizoramah Covid-19 vei mi 1,333 an tlin tawh thu sawiin, "Mizoram sorkarin eptu party-te leh mithiamte rawtna ngai pawimawh loa VC leh LC inthlan a buatsaih luih avangin community spread a thleng mek. Tun thlengin inthlan vanga Covid-19 inkai darh mi 50 chuang an awm tawh a, mipuiah khawi aṭanga kai nge an ni tih hriat loh tam tak an awm. CCC aṭanga positive chhuahtirte pawhin an kai darh nasa hle," a ti.

MNF kaihhruai sorkarin quarantine centre-a awmte tan RT-PCR test tih nan Rs. 2,500 leh TrueNat hmanga test atan Rs. 1,500 a chawitir mek tih sawiin Lallianchhunga chuan, "Mahni duh thua test duhte tan chuan RT-PCR-ah Rs. 4,500 leh TrueNat-ah Rs. 3,000 a chawitir. Sorkarin sample test man sang tak a lâk lai hian CMRF for Covid-19-ah, Covid-19 vanga harsatna tâwkte ṭanpui nan cheng vbc. 20.90 zet chhûn luh a ni tawh," a ti a; CMRF zinga nuai 600 chuang chu sorkar sum zawk hmanna àwm takah hman a nih thu a sawi.

MPCC Media Chair­man chuan, CMRF for Covid-19 chu sorkar ṭanpuina atan hman tur a nih loh thu sawiin, "Harsatna tâwk, mangangte ṭanpui nana hman tur a ni. Mizoramah erawh chuan CMRF chu sorkar bungrua leh khawl lei nan te, department leh DC-te hman atan te, RAT kit lei nante hman a ni. Sorkarin Covid-19 dona atana state sorkar sum hman a phal loh laiin, an duhsak zawngte hnenah contract cheng tam tak man an pe reng a, ṭhenkhat chu restricted tender-a pek an ni," a ti.

Dr Lallianchhunga, Covid-19 dona atana state sum hmang duh lo a, mi ṭhahnemngaite thawh khawm duh tâwka hmangah sorkar puhin, "Hetiang a nih laia sample test man sang tak a la reng hi hriatthiam theihah kan ngai lo a, mipui zahlohna leh pawisaklohnaah kan ngai. Community spread a thlen mek avangin a tam thei ang ber test a, a veite’n an thehdarh hmain rang taka hmuh chhuah a, enkawl zung zung a ngai," a ti a; test man a san avangin inringhlel tam takin sum harsatna vangin an infiah ngam loh thu a sawi.

Congress party Media hotute chuan, mipui sample endikna senso tur sum CMRF-ah a tam tâwk tih sawiin, "March 31, 2020-a MP Pu C Lalrosanga’n MP fund nuai 100 a pek tawh, tun thlenga CMRF-a la lut lo hi dil chhuah ni se. BJP, MNF leh ZPM MLA-te’n MLA fund nuai 25 ṭheuh an la thawh turte hi a rang lamin thawh se. Sorkarin CMRF aṭanga sorkar insènsona tur ni ngeia ngaih a hman tawh cheng vbc. 6 hi rûl bawk se. Hun eng emaw chen sample a thlawna test-na man a daih dawn a ni," an ti.

•    Pamphlet siam nan - Rs. 9,00,000

•    Truenat (Truelab Quottro Realtime Quantative Micro PCR Machine) 10 leh a ken tel lei nan - Rs. 3,19,83,830

•    Directorate of Hospital & Medical Education, Aizawl leh Kolasib DC-te hman atan - Rs. 1,40,42,000

•    RAT kit 20,000 lei nan - Rs. 1,40,29,000