KHAWTHLIR

Thisen pe

KṬP, Chanmari Branch, Aizawl chuan nimin khan an kohhran hall-ah thisen pek huaihawtin, Civil Hospital, Aizawl tan thisen unit 31 an pe a, petute mipa 28 leh hmeichhia pathum an ni. Biate HSS NSS Unit pawhin Mizoram HSS Games hmanga Aizawla an awm lai remchangah lain CHA Blood Bank-ah hian thisen unit 15 an pe a, petute mipa 14 leh hmeichhia pakhat an ni.

Hâlpuah hâl loh nan hma la

YMA, Electric Veng Branch chuan, an veng chhungah hâlpuah leh hâlmawi hâl a nih loh nan hma an la mek tih an tarlang. An tarlan danin, an venga chhung tinah halpuah hâl lo tura ngenna lehkha an pe vek a, veng chhunga hmun lûn laiah hâl lo tura ngenna banner an tar bawk.

Nula tla hlum

PC Lalruathlui (19) d/o PC Samuela, College Veng, Aizawl chu nimin khan puan a pho tur chesualin, a tla hlum. Thu dawn danin, PC Lalruathlui hi nimin chawhma dar 9:30 vel khan puan pho tura an in chunga a kal chu chesualin, kawngpuiah a tla thla a, damdawi-in panpui a nih hnuah a hliam tuar loin chhun dar 12:30-ah a thi; vawiin chhun dar 12-ah vui a ni ang.

Minister-in kâwm

Minister MLA Lalthansanga chuan nimin khan New Delhi-ah Power Grid Corporation of India hotute a kâwm a, a bial Aizawl East-I chhunga Mizoram State Cancer Institute chu CSR fund aṭanga tihchangtlun dan tur a sawipui.

Electric Vengin  chawimawina hlan

YMA, Electric Veng Branch chuan November 28, Ningani zan khan YMA Hall-ah Electric Veng Zan an hmang a, an veng mi, mahni kalna lama India ram leh khawvel huapa hlawhtling leh chawimawina dawng mi panga - Bhasha Shama Award 2024 dawngtu R Lalrawna, World Taekwondo Hqrs President-in chawimawina a hlan Vanlalsawma leh Joseph Thansanga, AIFF Club Futsal Championship-a Best Player Lalsangkima, Road to HornBill-a Best Guitarist Eric Lalremruata leh, thisen vawi 93 pe tawhtu C Lalremruata te an ni.