VC-te term tihtawi hi thil zahthlak tâwpkhâwk a ni - Dr R Lalthangliana

MNF senior vice president Dr R Lalthang-liana chuan nimin khan Mizo Hnam Rûna inkhawmah thu sawiin, sum harsatna chhuanlama mipui thlan VC-te term tihtawi chu thil zahthlak tâwpkhâwk niin a sawi.

Dr R Lalthangliana chuan, VC term kal lai chu September 7, 2025-a tawp tur a nih laiin, February 19, 2025-ah sorkarin a titawp tih sawiin, "Chhan leh vang mumal awm loin sorkarin a titawp. Democracy ramah sum harsatna chhuanlama mipui thlan ngei VC term pawh tawisak hi thil zahthlak tâwpkhâwk a ni," a ti.

15th Finance Commission hnuaiah PDRDG a kiam chhoh nasat avangin sum harsatna a awm lo thei lo tih chu a hma daih aṭanga hriat lâwk a nih thu sawiin, R Lalthangliana chuan, "PDRDG a tlakhniam rual hian, Share of Taxes-a kan hmuh a pung chho ve zel thung a, 14th FC-a kan hmuh loh RLB Grant chu 15th FC-ah kan hmu ṭha viau bawk," a ti a; PDRDG hmuh tlahniam zel chhuanlama VC term tihtawi chu chhuanlam tling lo niin a sawi.

Inkhawmah hian MNF general secretary PC Laldinthara pawhin thu a sawi a, VC term tihtawi chhan dik tak mipui hrilh turin sorkar a phût a ni.