HSS Games-ah Mizo HSS che ṭha ber

Mizoram Higher Secondary School Games vawi 21-na chu nimin khan Mizo High School tualah khâr a ni a, Education minister Dr Vanlalthlana'n a hmanpui. HSS Games-ah hian Mizo HSS pakhatna an ni.

School Education department buatsaih ni li awh HSS Games-ah hian infiamna chi (discipline) 10-ah zirlaite an intihsiak a; Aizawl chhung aṭangin zirlai leh zirtirtu 1,027 leh khawpui pawn aṭangin zirlai leh zirtirtu 641 an tel a, an vaiin mi 1,668 an ni.

Dr Vanlalthlana chuan, School Education department-ah health & physical instructor 238 an awm mek thu sawiin, "Infiamna lama tui leh thiam tak takte'n hmakhaw êng an neih nan leh India ram mai ni lo, khawvel huap pawha an thiamna pho chhuahsak turin nasa takin ṭan kan la dawn," a ti a; zirlaite tan zirna tibahlah lo zawnga zirna leh infiamna kalkawptir a pawimawh thu a sawi.

Zirnain a ken tel infiamna chu zirna huangah a pawimawh thu sawiin Minister chuan, "Infiamna hian thluak a ṭanpui a, min tiharhin min tihlim bawk. Zirna leh infiamna hi ṭhen hran theih loh, inchawih tâwka kalpui ṭul a nih avangin sikul naupangte'n rilru leh taksa hrisel an neih theih nan hunbi neiin infiamna hun neih a ṭul," a ti.