KHAWTHLIR

Disaster Management & Rehabilitation department chuan thuchhuah siamin, August 19, 2020-a sorkar thuchhuah tidanglamin, nimin aṭangin September thla chhung atan Lengpui Airport chu Thawhṭanni, Nilaini, Nilaithawhṭanni leh Inrinniah hawn a nih tur thu an tarlang. Nilaini leh Nilaithawhṭanni-ah Air India Flight a awmin, Thawhṭanni leh Inrinniah Indigo Airlines Flight a awm ang.

Assembly speaker Lalrinliana Sailo, deputy speaker Lalrinawma leh MLA dang 16-te chuan Covid-19 dona atan CM Relief Fund-ah nimin khan an hlawh an thawh. Speaker leh Dy. Speaker hian August thla hlawh aṭangin basic pay aṭanga 50% an thawh a, MLA dang zawngin basic pay aṭangin 30% an thawh thung.

Mizoram Board of School Education (MBSE) chuan thu­chhuah siamin, Septem­ber 14, 2020-a DIET Examination, 2020 buatsaih tum chu tun hnaiah Covid-19 darh zual zel avangin tiam chin awm loa ṭhulh a nih thu an tarlang. Exam neih leh hun tur chu inhriattir leh tura tih a ni.

Covid-19 dona atana ramri vênga duty, dam lohna vanga hun rei tak damdawi-ina enkawl ngaia awm Israel Zochhuanpuia s/o Rohlupuii, Zokhawthar chu nimin khan CM Relief Fund aṭangin ṭanpuin Rs. 50,000 hlân a ni. Ṭanpuina hi Champhai BDO R Lalnunkimi’n Israel Zochhuanpuii nu hnenah a hlân.

State Referral Hospital-ah nimin khan tlai dar 5 thlengin Covid-19 vei mi panga dah luh an ni a, anni nen hian hripui vei vangin mi 70 enkawl mek an ni. Enkawl mek zinga pakhat, mipa kum 40 mi chu thaw-hah avangin ICU-ah nimin khan sawn a ni a, mi dangte erawh chuan harsatna lian tham an nei lo.

Lawngtlai DC Dr Andrew H Vanlaldika chuan nimin khan Lawngtlai District Hospital-a TrueNAT Laboratory thar a tlawh a, a dinhmun enfiah. Lawngtlaiah hian TrueNat hi September 7 khan hman ṭan a ni.Lawngtlai DC Dr Andrew H Vanlaldika chuan nimin khan Lawngtlai District Hospital-a TrueNAT Laboratory thar a tlawh a, a dinhmun enfiah. Lawngtlaiah hian TrueNat hi September 7 khan hman ṭan a ni.