Champhai GNM School-in Capping & Lamp Lighting hmang

General Nursing & Midwifery (GNM) School, Champhai chuan a vawi khat nan nimin khan Capping & Lamp Lighting Ceremony an hmang a, Health & Family Welfare principal director Dr Vanlalsawma khuallian niin, HFW joint director (nursing) Lalchhanhimi khualzahawm a ni.

Inkhawmah hian Champhai District Hospital nursing superintendent H Vanlalhluni'n Champhai GNM School-a batch khatna leh hnihna zirlai 38-te lukhum a khumtir a, khawnvar chhittirin nurse thutiam an sawi rualtir bawk.

Champhai GNM School hi October 10, 2023 khan bul ṭan a ni a, zirlai batch hnih lut tawhin, zirlai 40 an awm mek. Principal hoin thawktu 12 an awm a, chung zingah chuan tutor pathum leh casual teacher pakhat an tel.