Mizoram Youth Commission hmalakna leh hmachhawp tarlang

Mizoram Youth Commission (MYC) chairman Dr Vanlalṭanpuia, MLA chuan September 9, Nilaini tlai khan Lunglei Press Club-ah thuthar thehdarhtute a kâwm a, MYC hmalakna leh hmachhawpte a sawi.

Dr Vanlalṭanpuia chuan, Mizo ṭhalaite hmasawnna turin MYC-in theihtawp a chhuah mek tih sawiin, "MYC hmalakna hi huam zau zawk leh ṭhalai tam zawkin an hman ṭangkai theih tura ruahman zel a ni. Central sorkar leh state sorkar hnuaia hna hrang hrang atan coaching buatsaih bakah, banking, sipai, NEET/ JEE coaching, sport, fashion, music, etc. lamahte inzirtirna leh inkaihhruaina mumal ngawrh taka kalpui tum a ni," a ti.

India rama IAS coaching hlun leh ṭha ber zinga mi ALS Coaching Academy, New Delhi nen ṭangkawpin Aizawl, Lunglei, Siaha leh Kolasib-ah IAS offline coaching class kalpui tum a nih thu sawiin MYC Chairman chuan, "ALS Coaching Academy faculty-te'n a hmunah an rawn zirtir dawn a ni," a ti a; central service atana inziah tlin tum, ṭhalai lehkhathiam mi 20 chu Delhi-a coaching centre ṭhaah zir turin MYC-in a tirh dawn thu a sawi.

Dr Vanlalṭanpuia chuan, MYC hmalakna thar Job-Portal sawifiahin, "Job Portal hi hna zawngte leh thawktu mamawhtute intawh khawmna tur, mobile application leh website ruahman mek a ni a, tun thla chhungin tlangzarh tum a ni. Portal kaltlang hian zirlai, ṭhalai, inhlawhfâkna mamawhte harsatna tam tak a sutkian kan beisei," a ti.

MYC Chairman sawi danin, MYC Convergence Plan 2020 hnuaiah MYC-in state páwna hna thawka eizawnna chánte tan an inhriattirna tur Google Form buatsaihin June 2, 2020 aṭangin hun hawn a ni a, mi 2,700 vel an inhriattir tawh. Inhriattirte chu department hrang hranga skill training awmte nen an thawhho theih dan tur convergence plan buatsaih a ni a, sorkarah thehluh tawh a ni.