MNYF-in Duhoma thusawi an nuihzat

MNF ṭhalaite chuan thuchhuah siamin, ZPM Legislature Party leader Lalduhoma'n 'ZPM thlipui a tleh' tia a sawi chu nuihzatthlak an tih thu an tarlang.

VC leh LC inthlan neih takah ZPM dinhmun dik tak mipui tan hmuh theiha a awm thu tarlangin MNYF chuan, "MLA pasarih meuh nei chungin an MLA bial pangaah VC/LC an party mala la thei loin an nil a, LC 83-ah pahnih chauh an la thei. Chuti chung chuan, tun VC/LC inthlana an mualpho êm avangin an mualpho thup nan ZPM hian tun LC inthlan neih zawh taka ZPM hminga dingte chu mi thar angin an lawm lut leh a ni," an ti.

MNYF chuan, ZPM chu belh tlak loha ngaiin mi tam takin an chhuahsan nia tarlangin, "ZPM-a mi pawimawh tak tak ni thinte pawhin Pu Duhoma party din an chhuahsan tawh a, ZNP tinung thar lehin office pawh an hawng hial tawh a, ZPM chhuahsan tum hi an la inhâwr khawm mek zela hriat a ni," an ti a; dinhmun ṭha lo taka an awm laia Lalduhoma'n ZPM thlipui a tleh nia a sawi chu 'Tuizem pawpa tui chhûn khah tum' anga an ngaih thu an sawi.

Kum 2019-a Mizoram MP inthlan hnuah ZPM President-in Congress an thawhpui tawh loh tur thu chiang takin a sawi tih tarlangin MNYF chuan, "VC/LC inthlan hma khan ZPM chuan circular chhuahin tu mah thawhpui loh tur an ti a. Mahse, inthlan a thlen meuh chuan an zâm leh a, hmun tam takah mal din ngam loin, an luak hnu Congress an thawhpui leh. Hei hian ZPM thlipui a tleh lohzia a tilang chiang hle a ni," an ti.