Khawtlang hmasawnna tura thawk turin LAD Minister-in VC thlan tharte a chah

Nimin khan Kolasib Diakkawn YMA Hall-ah village council tharte hnenah village task force (VTF) hruaitu nihna hlan inkhawm buatsaih a ni a; khuallian K Lalrinliana, LAD minister chuan, VC tharte chu khawtlang hmasawn nana thawh tum tlat turin a chah.

LAD Minister chuan, VC thlan tharte a lawmpui thu sawiin, "Sorkar leh VTF hnuaia pawl hrang hrangte thawhhona ṭha tak avangin hri donaah Mizoram chu ram pum ang pawhin a ti ṭha ber pawl a ni mek. State ti ṭha ber pawl ni mah ila, mithiamte chhût danin, December 2020 hian Mizoramah hripui vei mi 5,000 an tling tur a ngaih a ni a, ngaihtuahna fim tak pu chungin fimkhur taka hmalak a ṭul," a ti.

Hripui léng vangin ram pumah eizawnna kawngah leh ei leh bar dapna kawngah harsatna a thlen mek thu sawiin K Lalrinliana chuan, "Sorkarin theih ang tâwkin hma a la ṭhin. Sorkai laipui aṭangin thla riat chhung free ration kalpui mek a ni a, Mizoramah pawh National Food Security Act hnuaia awmte tan a thlâwna ration sem mek chu December 2020 thleng kalpui chhunzawm a ni dawn," a ti a; VC tharte chu Covid-19 hri dona leh khawthlang an kaihhruaina turah hmasawn tum turin a fuih.

Mizoram Finance Commission grant chu naktuk (vawiin) hian sum awm ang angte pek chhuah tum a nih thu sawiin Minister chuan, "Khawtlang hmasawnna tur a nih chuan VC term hmasaa ruahmanna siam tawh pawh ni se, ngaihtuahna zau tak hmang ang che u. Khawtlanga hmasawnna hna kalpuite chu a ṭha thei ang ber ni turin vil peih a pawimawh," a ti.

Inkhawmah hian Kolasib DC Dr H Lalthlangliana'n an district-a Covid-19 hri donaa VTF-te mawhphurna a sawifiah a; Kolasib SP Vanlalfaka Ralte-in dan leh thupek kenkawh chungchanga hriat tur pawimawhte a sawi bawk.