MSHCS leh damdawi-in 5 thawkho Sorkar laipui anga Mizoram kal turin duh

Mizoram State Health Care Society (MSHCS) chuan phai lama damdawi-in panga nen thawh dunna thuthlung, Memorundum of Settlement an ziak tawh. MSHCS hotute chuan, Central Government Health Scheme (CGHS) rate thar ber zel an hman avangin MR bill-a senso a tlem phah a, an kalphung chu Mizoram sorkar pawhin zawm ve se ṭhaa an hriat thu an sawi.

MSHCS hotute'n Vanglaini palai an hrilh danin, phai lama damdawi-in panga, MoU an ziahpuite chu, Kolkata-a damdawi-in pathum - Medica Superspeciality Hospital, Fortis Hospital leh BM Birla Heart Research Centre leh, Guwahati-a GNRC Hospital leh Chennai-a Apollo Hospital-te a ni. Kum khat chhung atan zel MoU an ziahpui a, kum 2011-2012 aṭangin an ziak ṭan.
MSHCS-a inziak lut damlo, phaia enkawl ngaite chu MoU an ziahpui damdawi-in panga zinga an inenkawl chuan damdawi-in lamin MSHCS-ah an rawn dil (bill) leh ṭhin a; damdawi-in pangate hian CGHS rate thar ber zel an hmang a, tun thlengin sum pek chhuah kawngah harsatna an la tawk lo niin an sawi.
Sorkar kum liam ta 2014-15 chhung khan MSHCS-a inziak lut zingah BM Birla Heart Research Centre-ah damlo 20 tirh an ni a, chung mite tana MSHCS senso chu Rs. 18,22,763 a ni. GNRC Hospital-ah damlo 28 kaltir an ni a, chung mite tana sum sen zat chu Rs. 23,52,022 a ni.
Medica Hospital, Kolkata-ah damlo 31 kaltir niin, Rs. 22,65,519 sen a ni a; Fortis Hospital-ah damlo 12 thawn niin, Rs. 14,35,364 sen a ni bawk. Kum 2014-15 chhunga damdawi-in palia damlo kaltir zawng zawng chu mi 91 an ni a, chung mite tana sum sen zat chu Rs. 78,75,668 a ni.
Heng damdawi-in pantute hi general ward-a awm vek tura tih an ni a, room changkang leh nuam zawk an duh a nih chuan an senso an intum a ngai.
MSHCS hotute chuan, "Damlo zat leh an natna aṭanga chhûtin, MSHCS-in an inekawlna senso damdawi-inte hnena an pek hi a tam lo a, damdawi-in danga senso chanve a nih loh pawhin 40% aia hniam a ni turah kan ngai," an ti.
MSHCS-in a kalpui dan hi sum tak tak humna a nih avangin state sorkar pawhin a hnathawk damlo a enkawlna, phai lama damdawi-inte chu MSHCS kalpui dan angin tih dan kawng zawng ve se a ṭhat an rin thu an sawi a, "Hetianga an kal ve dawn a nih chuan damlote'n sum an hman chu sorkarin a pek chhuah ve zung zung a ngai thung dawn a ni," an ti.
MSHCS hotute chuan, an hnena inziak lut RSBY card neite chu a theih hrâm chuan sorkar damdawi-inah lut thei se an duh thu an sawi a; Aizawla mimal damdawi-in zingah Aizawl Hospital leh Care Hospital tih loh chu MSHCS hian an thawhpui vek a, an thawhpui damdawi-ina awmte hian an hnenah an bill thei a ni.