KHAWTHLIR

Secy hna pek belh
Mizoram sorkar chuan secretary pahnih hna chanpual a tidanglam. Labour, Employment & Industrial Training secretary V Lalremthanga chu DP&AR leh Tourism department pek belh a ni a; Trade & Commerce special secretary P Lalchhuanga chu Vigilance pek belh a ni bawk.

Vety annual meet
Indian Veterinary Association, Mizoram chuan Inrinni khan Selesiha AH&Vety Department Rest House-ah Annual General Body Meeting an hmang a, AH&Vety secretary K Lalnghinglova'n a hmanpui. He hunah hian Regional Boar Sementation in-charge, Dr H Lalzarliana'n tun hnaia vawk kah raina hman lai mek aṭanga siam danglam a hmuhchhuah thar pho chhuah a ni.

Edu Options
Vawiin leh naktuk hian Assembly Annexe-ah 13th Edu Options 2015 neih a ni dawn a, chawhma dar 11 aṭanga tlai dar 5 inkarah tlawh theih a ni ang. Edu Options-ah hian India rama zirna in 50 vel an tel dawn nia thu dawn a ni.

Lawmpui dawn
National Sub-Junior Girls Football Championship-a tun hnaia champion Mizoram hmeichhe football team lawmpuina hun vawiin hian Hotel Regency-ah MFA chuan a buatsaih dawn a, Sports minister Zodintluanga'n a hmanpui ang.

In saksak
Lunglei Bazar Veng YMA chuan Inrinni khan hnatlangin an venga hmeithai pakhat in an saksak. In hi a dung ft. 16 leh a vâng ft. 12-a zau a ni a, in sakna atan bialtu MLA, Chalrosanga Ralte-in Rs. 40,000 a thawh.

Sikul hawng
Varpar khuaa English Medium School building thar chu May 29 khan Champhai DC H Lalengmawia'n a hawng. School-ah hian nursery aṭanga class XII thleng zir theih a ni a, building hi BADP pawisa cheng nuai sarih senga sak