Parbung OC sawn turin HM Zirliana'n Manipur Dy. Chief Minister ngen

Home minister R Lalzirliana chuan, Manipur-a Parbung Police Station officer-in-charge Tlang­thanzuala chu Hmar People Con­vention (Democratic)-te puitu nia an hriat avangin chhui chiang turin Manipur deputy chief minister Ghaikhangam Gangmei a ngen.

HM R Lalzirliana hian Manipur Dy. Chief Minister hnenah lehkha thawnin, Parbung PS OC Tlang­thanzuala'n HPC(D)-te a ṭanpui ṭhin a, May 21, 2015 pawh khan Manipur police motor hmangin Rengkai aṭangin HPC(D)-te silai mû tur a phurhsak niin a tarlang.

Parbung PS OC thil tih dan chu Mizoram sorkarin ṭha a tih loh thu leh a duh loh thu sawiin, R Lalzirliana chuan, Parbung PS OC chu tun hnaia Mizoram police-in an kah hlum, HPC(D) mi Malsawmkima thih dan chhuitu tur a nih avangin Parbung PS aṭanga sawn chhuak turin a ngen.