Sub-centre tan BP enna khawl hlân

Women & Child Development (WCD) department chuan Pradhan Mantri Matru Vandana Yojana (PMMVY) kaltlangin Mizoram puma health sub-centre zawng zawnga hman turin blood pressure (BP) enna khâwl an hlan.

Khawl hlanna inkhawm hi Social Welfare minister Dr K Beichhua pisaah neih a ni a; K Beichhua chuan, nautê leh nu nau paite enkawl kawngah WCD department leh Health & Family Welfare department-te thawhhona ṭha leh chak zawk an neih zel theihna atan thilpek hlan a nih thu sawiin, "Health worker, ASHA leh anganwadi worker-te'n thawhhona ṭha an neih zel chuan tun aia hlawhtling zawkin PMMVY hi kalpui theih ka beisei," a ti.

WCD director Vanlalpianpuii pawhin thu sawiin, "Health department nen thawhhona ṭha kan nei zel hi a lawmawm. Department pahnihte hi inláwm ang kan ni," a ti a; BP enna khawl chu Mizorama health sub-centre zawng zawngah nu nau paite'n a thlâwna BP an en theihna atana Health department hnena hlân an nih thu a sawi.

Health department aiawha lawmthu sawitu Dr Lily Chhakchhuak chuan, "Health department hi keimahni ngawr ngawra kal thei kan ni lo a, department hrang hrangte nen kan thawhho a ngai a ni," a ti.

PMMVY hi nu nau pai leh nau pawmte tana hamṭhatna sorkar laipuiin a duan a ni a, nuin nau a pawm chhungin a inenkawlna tur senso Rs. 5,000 a thlawna dawn theih a ni. Mahni awmna veng anganwadi centre ṭheuhah inziah luh tur a ni a; nimin thleng khan Mizoram pumah hamṭhatna dawng tawh mi 19,784 an awm.