Gas distributor-te dan zâwm tha loah puh

Mizoram Consumers Union (MCU) chuan thuchhuah siamin, Mizorama gas (LPG) distributor tam zawkin sorkar thuchhuak leh company kaihhruaina an zâwm ṭha duh lo niin an tarlang a, "Consumer-te'n an tuar mek a ni," an ti.

MCU chuan, sorkar laipui ruahmanna thar angin Direct Benefit Transfer for LPG (DBTL) tihlawhtling turin Mizoram sorkarin chak takin hma a la mek niin an sawi a; DBTL atan State Level Monitoring Committee din a ni a, chu chuan DBTL leh oil company policy anga consumer-te'n gas ṭha tak an hmuh theih nan hmalak mek a nih thu an sawi.

MCU thuchhuah chuan, gas distributor-te'n sorkar leh company-te dan an zawm ngei turte an tarlang a; gas chungchanga harsatna neite chu MCU office-ah consumer no. leh hming, distributor hming leh address te, pawisa chawitir zat leh ṭul dangte thlen turin an chah a ni.

MCU-in gas distributor-te zawm tur an tarlante:
1. Consumer card-ah gas lak ni (delivery date) an ziak ngei tur a ni a, cash memo an issue ngei tur a ni. Distributor-te'n consumer card xerox copy an phût tawh tur a ni lo.
2. Consumer-te'n pawisa (subsidy) an dawn loh pawhin cash memo (printed) leh consumer card-a ziah a ṭangkai dawn a, document a nih bakah ‘mandatory’ a nih avangin an issue ngei tur a ni.
3. Central thu angin chhungkaw khatin LPG connection pakhat chauh ‘subsidy’ atan phal a ni a, a pahnih/pathumnate chu non-subsidy category-ah dahin, Form-5 hmanga register tura tih a ni. Heng hi distributor-te'n consumer-te an hrilhfiah tur a ni.
4. Consumer-in LPG consumer no. leh account no. te Form 3 leh 4 hmangin (Adhaar Card nei tawh chuan Form 1 leh 2 hmangin) an tih fel hnuah, National Payment Corporation of India kaltlangin Permanent Advance Rs. 568 consumer account-ah a lut tur a ni. Consumer-in gas a lak apiangin ni hnih/khat chhungin ‘subsidy-na’ account-ah a lut tur a ni a, a luh loh chuan distributor-ah consumer no. leh hming leh mobile no. te ziakin thlen ni se, MCU office-ah a copy pek zel tur a ni. Gas la si loa account-ah subsidy a luh chuan consumer lak ai mi dang hnenah pek a ni thei. Gas hi kum khat chhungin bûr 12 chauh subsidy-na pek theih a ni a, a bak chu a man toa lak zel tur a ni.
6. Central policy angin gas hi mobile leh IVRS hmanga book ve ngei a nih theih nan IOC-in Mizoramah distributor-te tihhlawhtlintir ngei turin MCU chuan a phut tlat a ni.
7. Card holder a thih vang te, chhungkhat ni ṭhin fapa emaw fanu emaw unaute indang leh in hrang changte hnenah gas connection hming thlakin pawisa chawi a ngai lo. Voter ID nena hming inmil lo, hnam hming dah loh vang, etc. tea consumer card-ah KYC Form hmanga correction siam tur a ni a, pawisa chawi a ngai lo.