Kolkata airport-ah Mizo nula pahnih man

Passport lem hmanga Singapore pan tuma puh Mizo nula pahnih - Nuzawni d/o Lalthari, Mamit Chhimveng inti leh Lalrinfeli (23) d/o Zoramchhana (L) Seling intite chu tun hnai khan Netaji Subash Chandra Bose International Airport, Kolkata-ah man an ni a, thubuai siamsak niin, Barrackpore Jail-ah an táng mek.

Kolkata aṭanga thu dawn danin, Mizo nula pahnihte hi Kolkata Mizo Students hruaitu ṭhenkhatte'n an buaipui zui a; Lalrinfeli chu May 28, 2015 khan Kolkata aṭanga Singapore pan a tum laiin airport chhungah thuneitute'n an man a, Barrackpore Jail-ah an thawn a ni.

Nuzawni, Mamit Chhimveng nia insawi chu Lalrinfeli an man hma kár khan passport fel lo vangin man a lo ni tawh a; ani pawh hi Barrackpore Jail-ah a awm mek. An pahnih hian Global Talents Agency, Aizawl-in passport lem an siamsak ve vea sawi a ni.

KMS hruaitute chuan, Mizo nula pahnihte chu an thubuai a khirhkhân avangin bail chhuah theih mai an inrin loh thu an sawi.

Kolkata Mizo Students leh Calcutta Mizo Welfare Association hruaitute chuan, sum duh luat vangin passport lem hmanga mahni hnampui, chinchang hre lo zawkte bum duh an awm fo nia sawiin, thleng tawh lo se an duh thu an sawi a; chutih rualin, Kolkata-ah Mizote'n harsatna an tâwk a nih chuan, theihtawp chhuaha buaipui an inhuam thu an sawi bawk.