ZPM hi party ṭhang duang ber a ni - Lalduhoma

ZPM chuan September 9, Nilaini khan Darlawnah an party zawm thar lawm luh inkhawm an buatsaih a; an hun hmanpuitu Lalduhoma, ZPM Legislature Party (ZLP) leader chuan, Mizoramah ZPM chu party ṭhang duang ber niin a sawi. 

Lalduhoma chuan, VC leh LC inthlan chu inbuatsaihna awm mumal loin sorkarin a buatsaih nia sawiin, "Covid-19 hri lên lai a nih avangin inthlan sawn hla tura nawrna lian tak ngai pawimawh loin Assembly session-ah sorkar phawrh mualpho ni ngei dawna an hriat avangin session hma ngeia inthlan an rawt a, kan hlauh ang ngeiin community spread a thleng ta rêng a ni; a pawi khawp mai," a ti.

Vote thlak dan tur inzirtirna awm loin hripui léng karah hmanhmawh taka inthlan buatsaih a nih thu sawiin ZLP Leader chuan, "Vote thi a tam hle. Hri léng karah ruling party-te nasa takin an ṭang a, min vote-tu tura kan ngaih neutral-in vote an thlak ngam loh avangin vote pawh a tla tlem a ni," a ti a; MNF-in an sorkar vanglai taka LC/VC an lak zat chuan mipuiin a ning ṭan tih a tihlan thu a sawi.

Lalduhoma chuan, MNF-a beidawng, an mi leh sa tam tak an awm mek nia sawiin, "Beidawng zawng zawngte chu ZPM zawm a, sorkar ṭha siam tura thâ thawhpuiah ka sáwm a ni," a ti.

Congress chungchang sawiin Duhoma chuan, "Central aṭanga state thlengin hruaituah an buai a, Mizoramah pawh an president upa lam a ni tawh si a, han thlak dawn se thlakna tur an hre si lo. Chutiang dinhmuna ding an nih avangin an mi leh sa tam takin an tho chhuak leh lawk dawn lo niin an hria a ni," a ti a, Congress hruaitute beidawngin ZPM nena thawkho tur angin an insawi niin a sawi.

Lalduhoma chuan, ZPM chu party ṭhang duang ber a nih thu sawiin, "LC/VC-ah khati zat sorkarna an siam thei kha a lawmawm tak zet a, tunah hian Zoram mipui hian ZPM an thlir ṭhup a ni. Kan hrawn tawh party sorkar ni lo, 'Kalphung thar - Mipui sorkar' siam turin theihtawp i chhuah zel ang u," a ti.

ZPM secretary general K Sapdanga pawhin thu sawiin, an khingpuite chu kum tam tak sorkarna chelh tawh, party upa tawhte an ni tih a sawi a, "Keini kum thum vel leka upa kan ni chunga khati zat LC/VC kan la thei kha a lungawithlak tak zet a ni," a ti a; kum 2023-a Assembly inthlanpuiah ZPM-in party dang thawhpui loin sorkarna siam an tum thu a sawi.

ZPM thuchhuah tarlan danin, an party zawm thar Darlawnah mi 92, East Phailengah mi 162 leh Pehlawnah mi 60 an lawm lut a ni.