Mizorama Bru lo kir turte Vawiinah endik tan dawn

Tripura aṭanga Mizoram Bru-te lâk let tur chu vawiin aṭangin an endik ṭan dawn a, Kaskau camp-a mite endik hmasak an ni ang.

Bru lak let tur hi nimin khan Mamit Dis­trict Level Core Committee chuan an chairman Vanlalngaih­saka, Mamit DC hoin depart­ment hrang hrangte inpuahchah dan an thlirho.
Mamit bawrhsap Vanlalngaihsaka chuan, Bru-te lak letna turah engkim peihfel a nih tawh thu a sawi a, Mamit district chhung bikah chhungkaw 2,594 beisei an nih thu a sawi.
Meeting-a tarlan danin, vawiina Kaskau camp-a Bru-te endik hna thawk turin Mamit aṭangin team pathum an kal a, SDC-in a ho a, Kolasib district leh Lunglei district aṭangin team dang an kal bawk.
Vawiin aṭanga Kas­kau camp-a endik hna thawh a nih hnuah, June 8, 2015 aṭangin Mizorama hruai kîr hna ṭan tum a ni. Venhimna lam chu Mamit district-a police-te bakah, 4th IR leh 5th IR ten an thawk ang.
Nimina Mamita meeting-ah hian Lunglei DC leh Kolasib DC office aṭangin sorkar official-te an tel bakah, Home department deputy secretary leh OSD David H Lalthangliana-te an tel.
Nimin vek khan Bru lak let hna thawhnaa mawhphurtu zawng zawngte tan thil pawi-mawh inhrilhhriatna hun hman a ni a; Bru lak letnaa kal tur zawng zawngte chu Mamit bialtu pastor Rev. V Lalkima'n ṭawngṭaiin a thlah.
Bru lak let turte zinga chhungkaw 2,594 chu Mamit district-a awm dah tur niin, an awmna turin khaw 48 ruahman a ni a; Mamit bialah khaw 19, Hachhek bialah khaw 20 leh Dampa bialah khaw pakuaah dah tum an ni.
Lunglei district-ah chhungkaw 233 vel dah tur niin, an awmna tur hian khaw panga ruahman a ni a; khaw pangate chu - Buknuam, Putlungasih, Zohmun, Chawilung South leh Dinthar te an ni. Kolasib district-ah chhungkaw 628 vel dah tum a ni a, dahna tura khaw pariat thlante chu - Bairabi Awrpuar Veng, Meidum, Pangbalkawn, Zodin, North Thinglian, South Chhimluang, Dilzau leh Bukvannei te an ni.
Bru lak lêt tur chung­changah hian Mizoram Bru Displaced People Forum (MBDPF) president A Sawibunga chuan harsatna siam an tum loh thu leh Bru lak let chu thlâwp an tum thu a sawi a; chutih rualin, Mizorama an kìr leh kîr loh chu mimal duhthlanna a nih thu a sawi bawk.