World No Tobacco Day hman a ni

Nimin khan Mizoram hmun hrang hrangah World No Tobacco Day hman a ni. Aizawla Lal Thanhawla Auditorium-a hmanna chu chief minister Lal Thanhawla'n a hmanpui. Thupui chu ‘Stop illicit trade of tobacco products’ tih a ni.

Chief Minister chuan, vaihlo aṭanga siam chhuah zûk leh hmuamte chu hriselna tichhetu a nih bakah nunna la theitu a nih thu a sawi a, "Vaihlo zûk leh hmuam hi thil sual, crime a ni. Sorkarin meizûk khapna hmun a siama zu luite chu man theitu ruatte bakah police zawng zawngin man thei tura ngaihtuah a ni ang," a ti.

Lal Thanhawla chuan, Mizoram mipui zinga 67% chu zûk leh hmuama fihlîmlo an nih thu sawiin, "India rama a sang ber kan ni hial ang. Ringtu ni si hrisel ber awm tak, cancer ngah ber kan ni hi a chhuanawm lo a, zuk leh hmuam kan ti nasa lutuk hi a chhan lian tak a ni ngei ang," a ti a; faina leh thianghlimnaah pawh ṭan lak nasat a pawimawh thu a sawi.

Hawla chuan, "Zûk leh hmuama kan insên hreh loh laia pawisa ka nei lo kan ti ṭhin hi inbihchian nan hmang ila a duhawm hle," a ti a; zûk leh hmuamin hriselna a tihchhiat dan leh vaihlo aṭanga thil siam chhuah khapna dante chu nasa zawka puanzar a ṭul thu a sawi bawk.

Indian Society of Tobacco and Health (ISTH) Mizoram president Lal Riliani chuan, vaihlo chu do tham a ni a, do nasat a la ngaih thu a sawi a; vaihlo dona an kalpui ṭan tirh aṭanga tun inkarah hmasawnna nasa tak an hmu tih a sawi.

Inkhawm chairman, Lalhming-thanga, Health secretary pawhin thu a sawi a; Mizoram State Tobacco Control Society nodal officer Dr R Jane Ralte-in tun hnaia WHO aṭanga ISTH (Mizoram) leh MSTCS-in vaihlo do ṭha lawmman an dawn dan a sawi bawk.

World No Tobacco Day hi kum 1987 aṭangin May 31-ah hman ṭhin a ni a; kuminah Pathianniah a tlak avangin Mizoramah chuan nimin khan hman a ni.