KHAWTHLIR
Lirthei enfiah
AMC leh Aizawl City Traffic Police-te chuan nizan aṭang khan Aizawl khawpui chhunga dan loa kawngpui sira lirthei dah leh riahte an endik ṭan. AMC executive councillor (Parking) Rosiamngheta leh Traffic SP C Lalthanmawia te hoin an thawk chhuak a, pawl pali-ah inṭhenin an endik a ni. Lirthei MZ-01 F-7188 hnu lamte chu registration an tih dawnah garage neia inchhál vek an nih avangin kawngpui sira lirthei dah/riah an awm chuan an man zel dawn a ni.
Mat-ah tla hlum
Vanlalhriata (15), Lalchhungkaw Unity Kohhran Hnuchham In, Serchhip Hmarvenga awm chu May 30, 2015 chawhma dar 11 vel khan Mat luiah a tla a, May 31, Pathianni tlai dar 4 vel khan a tlakna aṭanga hla vak loah a ruang hmuh a ni.
Thing phun
Saitual Group YMA chuan tui hna humhalh nan nimin khan Ṭawi tlangah thing an phun. Thing phun hnatlangah hian mi 30 vel an thawk chhuak a; Saitual, Keifang leh Maite khaw tui lakna, Ṭawi tlanga tui hnâr awmnaah thing ṭiak 100 vel an phun a ni.
Kelkang enfiah
Champhai DC H Lalengmawia chuan nimin khan Kelkang harhna chhimtu mikhual an tam avangin Kelkanga harsatna awm theite enfiahin nimin khan Kelkang a tlawh a, khawtlang hruaitute nen thil pawimawh an sawiho. Champhai DC chuan, harsatna eng emaw, sorkarin a ngaihtuahpui theih chi a awm a nih chuan a hnena thlen hreh lo turin a chah a; Kelkang khawtlang hruaitute'n an mamawhte an lo thlen nghal bawk.
Motor chesualah thi
MIZOFED oil tanker khalhtu Lalramzauva (29), Chaltlang North chu Pathianni tlai khan Dholai, Cachar-ah motor-a chesualin a thi. Thu dawn danin, Lalramzauva chetsual chhan hi motor dang nen an inpelh dawn laiin a motor khalh chu a tlu nia sawi a ni a; a ruang hi nimin khan Silchar-ah endik a ni a, nizan khan an veng thlenpui a ni.