Hmeichhe sports thiam ni turin intih pâ kher a ngai lo - Awmpuii

Mizoram Football Association chuan nimin khan Hotel Regency-ah May 2015-a Odisha-a Natio-nal Sub-Junior Football Championship 2015-a champion Mizoram team-te lawmpuina hun an hmang a; Sports minister Zodintluanga leh Mizoram State Women Commission chairperson Vanlalawmpuii Chawngthu ten an hmanpui.

Women Commission chairperson chuan thu sawiin, champion team-a hmeichhe naupangte chu inti pa lo turin a chah a, "Khawvel hmeichhe infiam mite an inti pa kher lo a, Mizo hmeichhiate pawh inti pa kher loin sport person hlawhtling tak a nih theih," tiin a sawi.

Vanlalawmpuii chuan hmeichhe infiammite fuihin, "Mipate aiin hmingchiat a awl a, fimkhur a ngai. India ram tihmingṭhatu kan ni thei. Women Commission lam pawh hmeichhe football hmasawn nan kan inhuam reng a ni," a ti bawk.

Sports Minister chuan, MFA thawhrimna leh Catch Them Young hlawhtlinna a lang chhuak mek zel tih sawiin, "Mizoram football hlawhtlinna hi a ropui hle a ni," a ti a; a vawi khatna atana football-a Mizo hmeichhiate India rama an champion chu lawmawm a tih thu a sawi.

Zodintluanga chuan, champion team-te chu an bul ṭanna chauh a nih thu sawiin, tuna an champion chu duh tawk mai lo a, sang zawk leh ropui zawk thlen tum turin a fuih.

India rama football club ṭhaah Mizo an tel deuh vek tawh thu sawiin, Zodintluanga chuan, "State inelnaah pawh kan champion zel a, a lawmawm hle a ni," a ti a; tun hnaiah hockey-ah Mizo hmeichhe naupangte an champion thu sawiin, "Thenzawlah hockey khelmual ṭha kan siam aṭanga kum khat pawh tling loah India ramah kan champion thei a ni," a ti.

Mizoram team-te hi Vakiria dawrin thilpek an pekte chu Vanlalawmpuii'n a hlan a, MFA-in team member tin hnena Rs. 5,000 ṭheuh a pek chu minister Zodintluanga'n a hlan thung.

Inkhawm hi MFA finance secretary Lalruatsanga Tochhawng-in a kaihruai a; MFA honorary secretary Lalnghinglova Hmar-in thu a sawi bakah, team manager Lalnunsanga'n tournament an khelh dan chanchin a sawi.