Chhiatrupna thlen huna hman atan Central-in CSS sum 10% dah turin a ti

Sorkar laipuia Ministry of Finance-in January 6, 2014-a thuchhuah a siam angin, Centrally Sponsored Scheme aṭanga pawisa dawng sorkar department-te'n pawisa an dawn aṭangin 10% chhiatrupna thlen huna hman tur an dah hrang tur a ni a, mahse hei hi CSS dawng ṭhin department-te'n an zâwm ṭha lo hlea thu dawn a ni.

Ministry of Finance thu anga CSS pawisa dawngte'n chhiatrupna puala flexy-fund 10% an dah tur a nih chung­changah Disaster Manage­ment & Rehabilitation (DMR) department hotute chuan, sum chu an dah a nih chuan chhiatna thlen huna indin thar lehna atan leh min chhâwk zangkhaitu atan a pawimawh dawn tih an sawi a, "Mipui mamawh hmasa phuhrûkna atan a pawimawh a ni," an ti.

Sorkar laipui duh dan ang chu CSS sum dawngtu Mizoram sorkara department-te'n zâwm thei sen an duh thu sawiin, DMR hotute chuan, chhiatrupna thlen thulhah a tuartute tan ṭangkai tak a nih tur thu an sawi a ni.

DMR hotute chuan, Geo­Hazards International, Japan-in Aizawl dinhmun an zir chian tawhna aṭanga an hmuh danin, Aizawlah ritcher scale 6.5-a náin second 30 lek pawh lirnghing se, in 18,000 a chhe turah ngaih a nih thu an sawi a, "Lirnghing vanga chhiatna thleng palh ta se, department lian zual - Health, PWD, PHE, P&E, etc. te an pawimawh zual dawn a, mahse tuna kan dinhmun en chuan sorkar department-te leh mipuite inbuatsaihnain duhthu a sâm lo hle a ni," an ti.

Vanglaini zawhna chhangin, DMR hotute chuan, chhiatrupna thlen palha intun din lehna atan Aizawla insurance company-te an dâwr vek tawh thu an sawi a, Mizoram dinhmun chu a him loh avangin chhiatna thlen huna intun din leh nan insurance tih a pawimawh hle thu an sawi.

DM&R hotute chuan, "Neih zawng zawngin in kan sa a, chhiatna thleng se kan zavaia buaipui kan ngaih dawn avangin sorkar tan a buaithlak dawn. Bul kan ṭan lehna atan Aizawla insurance company-te hnena insurance tih nacháng kan hriat a pawimawh a, hei bak hi kawng dang a awm lo," an ti a; sorkar tihsak nghak lo a, insurance company-te hnena insurance ti turin mipui an ngen a ni.

Insurance tih kawngah puih ngai an awm chuan an inpeih reng thu DMR hotute chuan an sawi a; Aizawl bakah state danga insurance company-te pawh an zir chiang vek tawh niin an sawi bawk.