AMC sum pe chhuak turin sorkar phût

MPC ṭhalaite chuan thuchuah siamin, Aizawl Municipal Council (AMC) development fund atana Central-in cheng nuai 2000 chuang a rawn pek chu Mizoram sorkarin a hrêng reng nia sawiin, âwm lo an tih thu an tarlang a; a rang thei ang bera AMC kutah hlan turin sorkar an phût.

MPCY chuan, AMC-in Aizawl khawpui chhung hmasawnna hna thawh hmabak tam tak an nei tih sawiin, "A bikin mipuite him zawkna tura hnathawh ṭul tak tak a awm laia Mizoram sorkarin mipuite hma­khua ngaihtuahna nei hauh loa AMC sum a hrênsak reng hian mipuite thamlohna leh palzûtna lian tak a neiah kan ngai," an ti.

Mizoram sorkarin AMC sum a hun taka a pek chhuah lohin a pung a chawi reng niin an sawi a, "Mizoram sorkarin sum indaih lohna a neih vanga harsatna lian tak a tawh reng laia a phur tibelhchhah tur a insiamchawp zel mai hian financial management-ah Mizoram sorkar a hlawhchham chianzia leh kal ngaihna an hriat tawh lohzia a tilang chiang hleah kan ngai," an ti bawk.