Harhnain politics-ah Pathian ram thlen se - Lalduhoma

ZNP president Lal­duhoma chuan, tunlaia Mizorama Pathian thla­raua harhna thleng mek chuan Mizoram politics-ah Pathian ram thlen se a duh thu sawiin, "Hei hi kan beisei leh duhthusam a ni," a ti.

Nimina ZNP pisaa inkhawmah thu sawiin, Lalduhoma chuan, Mizoramah harhna vawi eng emaw zat thleng tawh mah se, ram danga harhna thleng ṭhin nen a inang lo hle niin a sawi a, "Khawvel hmun danga harhna thleng ṭhin chuan an ram rorel khawl a thleng pha a, kan ram harhna thleng mek hian kan ram rorel khawl nghawng ve se tih hi kan duh," a ti a; harhna thleng mek chuan hnam inpumkhatna thlen se an duh thu a sawi.

Lalduhoma chuan, harhna thleng mek chuan bûklungte tidik se, ration card leh cubic lungte tidik se, zangnadawmna dik lo lak ṭhinte titawp se a duh thu sawiin, "Ram roreltu thlannaahte hian he harhna hian kan ram rorelna tidanglam khawp harhna thlen se, ‘Zoram politics-ah Pathian ram thleng rawhse’ tih hi ZNP chuan a duh tak zet zet a ni," a ti.