Hmun hrang hrangah No Tobacco Day hmang

May 31, 2015 khan World No Tobacco Day a ni a, nimin khan Mizoram hmun hrang hrangah hman a ni.

World No Tobacco Day hi Lungleiah chuan Saikuti Hall-ah Lunglei District Tobacco Control Cell leh National Programme for Pre­vention & Control of Can­cer, Diabetes, Cardio­vas­cular Diseases & Stroke buat­saih­in hman a ni a; Lung­lei CMO Dr VLMS Dawng­liana'n kai­hruaiin, YMA sub-head­quarters Lunglei president R Lalnunthara khuallian a ni.

R Lalnunthara chuan, Mizoramah mipa 80% leh hmeichhia 60% ten vaihlo an ti ṭhina chhût a nih thu a sawi a, "Zirlai zingah pawh 54% vel chu vaihlo lakah an filhîm loa hriat a ni a, chuvangin vaihlo laka kan fihlim theih nan sorkar, kohhran leh NGO-te kan ṭanrual a ngai a ni," a ti.

Champhaiah chuan IPR Auditorium-ah Champhai District Anti-Tobacco Squad buatsaihin hman a ni a, Champhai DC leh Anti Tobacco Squad chairman H Lalengmawia'n a hmanpui. Champhaiah hian COTPA Section 7-na bawhchhiaa pictorial warning tel loa cigarette zawrh an mante an tihral bakah, rally an nei bawk.

Mamitah pawh World No Tabacco Day hi DC Conference Hall-ah Mamit DC Vanlalngaihsaka hoin hman a ni a; DC-in thu a sawi bakah, Mamit District Anti Tobacco Squad member secretary Dr Hmingthanmawii'n report pein, June 2014 aṭanga squad drive vawi 16 an neihah phal lohna hmuna mei zu mi 30 man a nih thu a sawi. Anti Tobacco Squad member JH Lalparmawii, Mamit IPRO-in thupui ‘Stop illicit trade of tobacco products’ leh COTPA dan ṭhenkhatte a sawifiah a ni.

Serchhipah chuan CMO Conference Hall-ah hman a ni a, Serchhip DC Juhi Mukherjee khuallian a ni. Serchhip CMO Dr Laldawngliana Sailo-in kaihruaiin, vaihlo khapna chungchanga dan hrang hrangte a sawi a; Serchhipa vaihlo zuarte an tel.

Report-a a lan danin, Serchhip District Anti-Tobacco Squad chuan nikum leh kumina World No Tobacco Day inkarah squad drive vawi 19 neiin, dan bawhchhia mi 162 an man a, pawisa an chawitir belhkhawm chu Rs. 6,060 a ni.

World No Tobacco Day hi Agriculture directorate conference hall-ah pawh hman a ni a, Agriculture department-a thawkte an tel a ni.