India rama hockey champion lawmpui

May 18-26, 2015 chhunga Ranchi-a India ram pum huap Sub-Junior Hockey Tournament-a champion Mizoram hmei­chhe hockey team-te chu nimin khan Mizo­ram State Sports Coun­cil (MSSC)-in an pisa­ah lawmpuina hun an hmang a; ZOHANDCO chairman R Vanlalvena, MLA-in a hmanpui.

R Vanlalvena MLA chuan, "India ram ropui taka champion nih theih hi a ropui a, a hre chiang apiangin a ropuizia an hria. Mizote'n hruaitu ṭha tak kan neih tak avangin infiamna lamah hma kan sawn em em a, hmasawn zel tur leh Mizoram tihmingṭhatu ni zel turin kan infiammite duhsakna ka hlan a ni," a ti a; hockey player-te chu zûk leh hmuama insûm tur leh taimakna leh chhelna nena hmasawn zel tum turin a fuih.

5th Sub-Junior Hockey India National Championship 2015 (Women)-ah hian Mizo­ramin final-ah Hockey Patiala chu 9-0 a hnehin an champion a; a hmain Vidharbha 16-0 in, Uttara­khand 29-0 in, Chandhigarh 3-2 in an hneh a ni.

Mizoram Womens Hockey Association chuan an player-te hnenah lawmpuina Rs. 1,000 ṭheuh an hlan a, an pawl president Lalrampari'n Rs. 1,000 ṭheuh player-te a hlan bawk.