Mizoramin chawchhûn sum a dawng tawh; Chawchhûn dawng tur zirlai 1,38,327 an awm

Sorkarin primary school leh middle school zirlaite hnena chawchhun, midday meal (PM-POSHAN) a sem ṭhina pawisa bate pek tlâkna tur Mizoram sorkarin central aṭangin a dawng tawh. Mizoramah academic session 2024-25 atan midday meal dawng tur zirlai 1,38,327 leh cook-cum-helper 4,883 an awm.

Vanglaini palai zawhna chhangin School Education department hotute chuan, zirlaite chawchhun atana ei siamtu (cook-cum-helper)-te leh chawhmeh man atana pawisa la pek lohte pekna tur chu sorkar laipui aṭangin an dawn tawh thu an sawi a, "November 20, 2024 khan sorkar laipuiin kum 2024-25 first instalment cheng nuai 515.91 min rawn pe a, kumina bâte chu kan pek tlak theih kan ring. Pawisa hi Finance department aṭangin a lo chhuak tawh a, vawiin (Nov. 29) hian Treasury-ah bill kan thehlut," an ti.

School Education department-a midday meal (PM-POSHAN) hotute chuan, tun dinhmunah sorkar primary school 1,409 leh middle school 1,090-ah midday meal cook-cum-helper 4,883 an awm mek thu Vanglaini an hrilh a; cook/helper hlawh tur chu sorkar laipuiin Rs 900 a tum a, state sorkar chu a tlem berah Rs 100 tum tura tih a nih thu an sawi.

Cook-cum-helper pakhat hlawh atana sorkar laipuiin pek Rs 900 baka state sorkarin a pek ṭhin Rs 600, a vaiin Rs 1,500 ni ṭhin chu tuna sorkar mekin a tipung tih sawiin PM-POSHAN khawihtute chuan, "Tunah chuan central-in a rawn pek bakah state sorkar chuan Rs 2,100 a pek belh a, an hlawh hi Rs 3,000 a ni tawh," an ti.

PM-POSHAN hotute sawi danin, Mizoram sorkar tharin state sum aṭanga cook-cum-helper 4,883-te hlawh tur a tihpun hnuah cook-cum-helper te hlawh atan thla tin sorkar laipui sum Rs 43,94,700 leh state sorkar sum Rs 1,02,54,300 sèn a ngai dawn.

Kum 2024-25 atana primary school leh middle school zirlai, chawchhun ei tura chhût chu 1,20,605 an ni a, pre-school (Baalvatika) naupang 17,722 chhût tel a ni bawk.

PM-POSHAN hotute chuan, zirlai enrolment zat chu thla tin deuhthaw a danglam thu sawiin, "A dik thei tur ang bera chhûtin sorkar laipuia Midday Meal Scheme-a Programme Approval Board (PAB)-ah kan thehlut. Central-in a ruahman ang chuan chawchhunah hian P/S zirlai pakhat tan ni khatah Rs 6.11 leh M/S zirlai pakhat tan Rs 8.35 zel dah a ni a, an chawhmeh turte hi dietitian-te'n an ruahman ṭhin," an ti a, raltlan zirlai naupangte pawh an kêp vek thu an sawi.

Zirlaite chawchhun kaihhnawihah hian sorkar laipuiin a vaia a tum leh state sorkar nena an intum sem eng emaw zat a awm thu sawiin PM-POSHAN hotute chuan, "Buhfai leina, phurhna leh a kaihhnawih thil dang (management, monitoring & evaluation) chu central-in 100% a rawn tum. Chawhmeh man leh cook-cum-helper hlawh chu central leh state sorkarin an intum sem thung," an ti. Sorkar hmalak dan azirin choka siamna leh cheiṭhat te, choka hmanruate chu central leh state sorkarin 90:10-a an intum sem thu an sawi bawk.