World AIDS Day pualin HIV/AIDS chungchang inzirtirna hun hmang

Nimin December 1 kha HIV/AIDS dona ni, World AIDS Day a ni a, he ni pual hian Mizoram Presbyterian Kohhrana tualchhung kohhran hrang hrangte chuan nimin khan inkhawmah HIV/AIDS chungchang inzirtirna hun an hmang.

Presbyterian Kohhran hian Synod Social Front hmalaknain HIV/AIDS chungchang inzirtirna hun an hmang a; Social Front chuan, "HIV/AIDS-in Mizo mipui min rùn dan leh tuna kan dinhmunte ngun taka ngaihtuah hian kohhrante'n rilru dik tak sênga hma kan lak a ṭul tawh tak zet a. A theih chin zelah MSACS hmalaknate lo thlâwp tlat tur pawhin kan insawm a ni," an ti.

Synod Social Front chuan World AIDS Day thuchah an tihchhuahah, HIV/AIDS-a Mizoram dinhmun siamṭha turin sorkar kuta dah ngawt a tawk zo lo tih sawiin, "Kohhran hote'n kan tih theih tawk ṭheuh ti turin kawng dik kan zawh a hun tak zet a ni," an ti a; HIV laka Mizoram a fihlim theih nan thawhho zir a ngaih thu leh kohhran anga hmalakna remchang loah a ti mi leh thiam bikte nen thawhho thiam a ṭul thu an tarlang.

HIV-in Mizoramah bu a khuar nghet tawh hle tih tarlangin Social Front chuan, "Kristian ram kan nihna nen a inhmeh lo a, chuvangin, Pathian chakna ringin, kohhran hote'n tha thlah loa kawng dik zawha do zel turin i inbuatsaih ang u," an ti.

World AIDS Day hi World Health Organisation ruahman angin kum 1988 aṭangin kum tin hman a ni a, kumina thupui chu 'Take the right path' (Kawng dik zawh) tih a ni.

Mizoram State AIDS Control Society (MSACS) chhinchhiah danin, March 2024 thleng khan Mizorama HIV kai mi 30,523 hmuh chhuah a ni tawh a, chung zinga 91.23% chu ṭhalai, kum 15-49 inkar an ni. HIV kai zinga 65% vel chu mipat hmeichhiatna aṭanga kai an ni a, 30% vel chu ruihhloa inchiuna aṭanga kai niin, 2.7% vel chu nu-in a faa a kai chhâwn a ni. 1.4% vel erawh chu kai chhan hriat chian loh a ni thung.

National AIDS Control Organisation (NACO)-in HIV Estimate a tihchhuah thar ber, kum 2023-a a tihchhuahah chuan Mizoram mipui zawng zawng zinga 2.73% chu HIV vei an ni a, India ramah state mipui zat aṭanga chhûta HIV vei tamna ber a ni. Mizoram hi Nagaland (1.37%) leh Manipur (0.87%)-te'n an dawt a ni.