Bána Kaih hnuaiah sawhthing hralh

Champhai district-a Dungtlang khuaa sawhthingte chu Bána Kaih (Handholding) scheme hnuaiah November 30, Inrinni khan hralh ṭan a ni.

Dungtlang khuaa sawhthing metric ton 11 chu November 30 zing khan North Eastern Region Agri Commodity e-connect (NERACE) leh Mizoram Agricultural Marketing Board (MAMB) ṭang dunin Hliappui Self Health Group (SHG) VO1 Ginger Processing Unit hnenah an hralhpui a; Hliappui SHG hian sawhthingte chu a ṭul angin an buaipui zui ang.

Thu dawn danin, Dungtlang khuaa sawhthing metric ton 11 (quintal 110) zinga quintal 70 chu kg. khat Rs 50-a lei a ni a, quintal 40 chu Rs 30-a lei a ni.

NERACE hian sawhthing bakah hmarcha lei leh hralh chungchangah online kaltlangin leitu tur (buyer) leh a thartu (farmer society)-te thlun zawm turin hma an la mek a, Mizoram Agricultural Marketing Board nen an thawkho a ni.

Bána Kaih (Handholding) scheme buaipuitute chuan Vanglaini zawhna chhangin, Mizote'n thlai an chînte chu a tlangpuiin hun bik nei a nih thu leh sorkarin price support a pek tur pawh hun bik nei a ni tih an sawi a, "Support price hi hun bik nei a ni a, kumtluan a tan a ni lo. Sawhthinga support price pek theih hun chhung chu January-May a ni," an ti.