KHAWTHLIR

Thisen pe

November 30, Inrinni khan KṬP, Lungleng-I Bial chuan ZMC tan thisen unit 57 an pe a, petute mipa 41 leh hmeichhia 16 an ni a; KṬP, Sihphir Bialin Synod Hospital tan unit 31 an pe a, petute mipa 27 leh hmeichhia pali an ni. KṬP, Serchhip Bethel Branch-in Serchhip District Hospital tan unit 16 an pe a, petute mipa 14 leh hmeichhia pahnih an ni. ṬKP, Hnahthial South Bial member mipa 45 leh hmeichhia 10-te'n Lunglei Civil Hospital tan thisen unit 55 an pe bawk.

Tla hlum

Inrinni zan zanlai pelh hnu, nimin zing lam dar 12:30 vel khan Lalnunthari (36) d/o Lalneihkimi, Champhai Kanan Veng chu an tukverh aṭangin a tla hlum. Thu dawn danin, Lalnunthari hi a inthiar tur chu tukverhah a tla palh a, a hliam tuar loin a thi nghal a ni.

Home-ah ṭanpuina pe

Khawzawl District AIDS Prevention and Control Committee member-te chuan nimin zingah khan SDO (Sadar) Suvigya S Chandra hoin World AIDS Day pualin Khawzawla ruihhlo ngaite enkawlna hmun pahnih - Chhanchhuahna Home leh Grace Camping Center-ah tél, alu, dâl leh bekang sa (nutrela) eng emaw zat bakah pawisa an pe.

ZORAMBO Comics

Art & Culture minister C Lalsawivunga chuan November 29, 2024 zan khan Republic Vengthlang YMA Hall-ah B Lalnunmawia, Republic Vengthlang ziah 'ZORAMBO Comics' tih lehkhabu a tlangzarh.

Lirthei endik

Mamit SP Pukhraj Kamal ruahman angin Mamit police-te chuan No Tolerance Week 2024 pualin November 24, 2024 aṭang khan Mamit khawpuiah lirthei veivâkte an endik. Hmun paliah lirthei endik a ni a; lirthei 329 an endik zinga 29-in dan zawm ngaite an zâwm kim lo. Dan zâwm kim lo lirthei 29 neitute chu pawisa chawitir an ni a, an pawisa chawi tlingkhawm chu Rs 38,000 a ni.